آئیے اس عید کو غریبوں، یتیموں اور مسکینوں کے ساتھ مل کر منائیں : زورآور سنگھ
ماجد چوہدری
پونچھ مرکزی زیر انتظام جموں و کشمیر کے سرحدی ضلع پونچھ سے پبلک ویلفیئر فرنٹ کے چیئرمین زورآور سنگھ شہباز نے اپیل کی ہے کہ آنے والی عید غریبوں، یتیموں اور ناداروں کے ساتھ منائیں، انہوں نے کہا کہ اس عید پر ہمیں ان کو زکوٰة، نئے کپڑے، مٹھائیاں اور ڈھیر ساری خوشیاں دینی چاہئیں تاکہ وہ اپنے آپ کو اس مقدس ماہ کے بعد آنے والے خوشیوں کے تہوار پر خود کو اکیلا نہ سمجھیں اور انکو خوشیوں سے نوازیں۔ انہوں نے کہا کہ ان غریبوں کو خوشیاں دے کر، ان کی ضرورتیں پوری کر کے، ان کی مدد کر کے یقین رکھو کہ اللہ کی رحمت تم پر برسے گی اور تمہاری ساری مصیبتیں ختم ہو جائیں گی۔فرنٹ کے چیئرمین زورآور سنگھ شہباز نے کہا کہ جو بھی اپنی کمائی سے غریبوں، یتیموں، بوڑھوں، معذوروں، ناداروں اور ضرورت مندوں کی مدد کرتا ہے، اللہ تعالیٰ اس کی ہر قدم پر مدد کرتا ہے۔انہوں نے کہا کہ رمضان المبارک کے مقدس مہینے میں آپ نے جو بھی عبادات، نیکیاں کی ہیں وہ سب اللہ کی بارگاہ میں قبول ہوں گی، اگر آپ امید کی کرن بن کر غریبوں کی مدد کریں گے۔انہوں نے کہا کہ اپنے محلے اور گھر کے آس پاس ضرور دیکھیں کہ کس کو آپ کی ضرورت ہے اور آپ اس کی بھرپور مدد کریں۔اس موقع پر فرنٹ کے ممبران رویندر کور کومل، شاہنواز خان، بشیر احمد جٹ، جہانگیر حسین ہمدرد، اجگر سنگھ، من پریت سنگھ بھی موجود تھے۔
