کنسل نے ڈاکٹر پرگیہ کھنہ اور جی ڈی سی چنینی کے طلباء کی عوامی بیداری کی کاوشوں کی ستائش کی
لازوال ڈیسک
جموں؍؍گورنمنٹ ڈگری کالج چنینی نے پرنسپل سکریٹری محکمہ ہائر ایجوکیشن روہت کنسل کے ہاتھوں سیو ریور دیویکا پر بڑے پیمانے پر بیداری مہم پر حتمی رسالہ کا آغاز کیا۔بڑے پیمانے پر آگاہی مہم کا رسالہ کالج کی طرف سے حال ہی میں مکمل کیے گئے تحقیقی پروجیکٹ کے ایک حصے کے طور پر جاری کیا گیا جس کا عنوان ’ہائیڈرو کیمیکل امپیکٹ اسسمنٹ، اینتھروپوجنک پریشر کا مطالعہ اور دیویکا ندی کے تحفظ اور پانی کے زیر زمین ذرائع (باؤلیس) کے تحفظ پر بڑے پیمانے پر عوامی بیداری‘تھا۔اس موقع پرپروجیکٹ کی پرنسپل انویسٹی گیٹر اور پرنسپل، جی ڈی سی چنینی ڈاکٹر پرگیہ کھنہ نے زور دیا کہ تحقیقی پروجیکٹ کا بنیادی مقصد دریائے دیویکا کو آلودگی سے پاک بنانا اور اس کی قدیم شان کو واپس لانا ہے۔ انہوں نے کہا کہ ادارے کے لیے یہ بڑے فخر کی بات ہے کہ وہ دریااور اس سے ملحقہ باؤلیس پر اس تحقیقی شراکت کے ذریعے ضلعی انتظامیہ کے ساتھ اس بڑے منصوبے میں ہاتھ ملانے کے قابل ہوا اور ایک تحقیقی جزو کو شامل کرنے کی اہمیت پر زور دیا۔ وہیںپرنسپل سکریٹری نے ڈاکٹر پرگیہ کھنہ اور جی ڈی سی چنینی کے طلباء کی عوامی بیداری پیدا کرنے اور عوام کو آبی ذخائر کی اہمیت اور زندگی کی بقا کے ایک اقدام کے طور پر ان کے تحفظ کے بارے میں آگاہی دینے کے لیے تحقیقی پہل کرنے کی کوششوں کی تعریف کی۔ واضح رہے یہ ایک تحقیقی کام انجام دیا گیا ہے جس سے مختلف سٹارٹ اپ آئیڈیاز اور سفارشات سامنے آئی ہیں جو کمیونٹی پر اثر ڈال سکتے ہیں اور مختلف منصوبوں کے قیام میں کاروباری افراد کی مدد کر سکتے ہیں۔
