یواین آئی
نئی دہلی؍؍ پوجا گہلوت نے ہنگری کے بڈاپیسٹ میں چل رہی انڈر -23 ورلڈ کشتی چمپئن شپ میں خواتین کے 53 کلوگرام کلاس میں جمعہ کی رات چاندی کا تمغہ جیت کر ہندوستان کو مقابلہ میں دوسرا تمغہ دلا دیا جبکہ جیوتی کو 50 کلوگرام کا کانسی تمغہ مقابلے اور نینا کو 72 کلوگرام کے ریپینچیز میں شکست کا سامنا کرنا پڑا۔پوجا نے 53 کلوگرام میں کوالیفکیشن میں روس کی کیتھرین ویربینا کو 8-3 سے اور کوارٹر فائنل میں تائی پے کی مینگ سان سیہ کو 8-0 سے شکست دے کر سیمی فائنل میں جگہ بنائی جہاں انہوں نے ترکی کی جینیپ یتگل کو 8-4 سے شکست دے کر فائنل میں داخلہ حاصل کیا۔ پوجا کا طلائی تمغہ کے لئے 2017 عالمی چمپئن جاپان کی ھارنا اوکنو سے مقابلہ ہوا جس میں انہیں نزدیکی جدوجہد میں 0-2 سے شکست کا سامنا کرنا پڑا اور سلور سے اکتفا کرنا پڑا۔ہندوستان کا اس مقابلے میں یہ دوسرا چاندی کا تمغہ ہے ۔ اس سے پہلے مرد فری اسٹائل میں رویندر 61 کلوگرام کے فائنل میں پہنچے تھے اور انہیں چاندی سے اکتفا کرنا پڑا تھا۔ ہندستان نے اس طرح اپنی گزشتہ کارکردگی کو بہتر بنا لیا ہے ۔ ہندستان نے پچھلی چمپئن شپ میں ایک چاندی کا تمغہ جیتا تھا۔جیوتی کو 50 کلوگرام میں سیمی فائنل میں جاپان کی کیکا کگاتا سے 4-15 سے شکست کا سامنا کرنا پڑا تھا اور کانسی مقابلے میں انہیں روس کی نادیجدا سوکولووا سے 0-10 سے شکست کھانی پڑی۔ اس دوران 72 کلوگرام میں نینا کو کیوبا کی ملیمز پوٹرلے نے 13-3 سے شکست دی لیکن پوٹرلے کے فائنل میں پہنچنے سے نینا کو ریپینچیز میں اترنے کا موقع ملا لیکن انہیں روس کی ایوگنیا جاخرچیکو سے 0-10 سے شکست کا سامنا کرنا پڑا اور وہ باہر ہو گئیں۔دیگر وزن زمروں میں پنکی کو 57 کلوگرام کے کوارٹر فائنل میں کینیڈا کی حنا ٹیلر سے نزدیکی جدوجہد میں 1-2 سے شکست کا سامنا کرنا پڑا۔ ٹیلر کے سیمی فائنل میں ہارنے سے پنکی کی ریپینچیز میں اترنے کی امیدیں ٹوٹ گئیں۔ 62 کلوگرام میں ریشما مانے کو پری کوارٹر فائنل میں یوکرین کی الونا پروکوپیونیوک سے 0-2 سے شکست کا سامنا کرنا پڑا۔ یوکرین کی پہلوان کو سیمی فائنل میں شکست کا سامنا کرنا پڑا، جس کے ساتھ ریشما باہر ہو گئیں۔65 کلوگرام میں نشا کو کوالیفکیشن میں امریکہ کی مایا نیلسن نے 11-3 سے شکست دی۔ نیلسن پھر کوارٹر فائنل میں ہار گئیں جس سے نشا کی امیدیں ٹوٹ گئیں۔ اس سے پہلے کل 55 کلوگرام میں رانی رانا، 59 کلوگرام میں پوجا ، 68 کلوگرام میں سمن اور 76 کلوگرام میں پوجا ہار کر باہر ہو گئی تھیں۔
