یواین آئی
برسبن؍؍گیندبازوں کی شاندار کارکردگی کے بعد جارح اوپنر ڈیوڈ وارنر کے ناٹ آوٹ 60رن کی بدولت آسٹریلیا نے سری لنکا کو دوسرے ٹی۔20مقابلے میں بدھ کو 9وکٹ سے شکست دیکر تین میچوں کی سیریز میں 2-0کی ناقابل تسخیر سبقت حاصل کرلی ہے ۔ آسٹریلیا نے سری لنکا کو 19اوور میں 117رن پر سمیٹنے کے بعد 13اوور میں ایک وکٹ پر 118رن بناکر آسان جیت حاصل کرلی۔ پہلے میچ میں ناٹ آوٹ سنچری بنانے والے وارنر نے اس میچ میں ناٹ آوٹ نصف سنچری بنائی۔ وارنر نے محض 41گیندوں پر 9چوکوں کی مدد سے ناٹ آوٹ 60رن بنائے اور مسلسل دوسرے میچ میں پلیئر آف دی میچ بنے ۔ وارنر نے اسٹیون کے ساتھ دوسرے وکٹ کے لئے 117رن کی میچ جیتانے والی شراکت کی۔ کپتان آرون فنچ کھاتہ کھولے بغیر پہلے ہی اوور کی تیسری گیند پر لست ملنگا کے شکار بنے لیکن اس کے بعد وارنر اور اسمتھ نے سری لنکائی گیندبازوں کو کوئی موقع نہیں دیا۔ اسمتھ نے 36گیندوں میں ناٹ آوٹ 53رن بنائے جن میں چھ چوکے شامل ہیں۔ اس سے پہلے سری لنکا کی اننگز میں بلی اسٹین لیک، پیٹ کمنس، ایشٹن ایگر اور ایڈم جمپا نے دو دو وکٹ لیکر مہمان ٹیم کی اننگز کو 117رن پر ختم کردیا۔ وکٹ کیپر کشل پریرا نے سب سے زیادہ 27رن اور اوپنر دانشکا گناتلکا نے 21رن بنائے ۔ آویشکا فرنانڈو نے 17، وانندو ہسارنگا نے 10، اسورو ادانا نے 10اور لکشن سنداکن نے دس رن بنائے ۔ سری لنکا نے آخر ی آٹھ وکٹ 64رن جوڑکر گنوائے ۔ اسٹین لیک نے 23رن پر دو وکٹ، کمنس نے 29رن پر دو وکٹ، ایگر نے 27رن پر دو وکٹ اور جمپا نے 20رن پر دووکٹ لئے ۔
