یواین آئی
بھونیشور؍؍ اڑیسہ کے بھونیشور میں ایک اور دو نومبر کو کھیلے جانے والے طویل انتظار ایف آئی ایچ اولمپکس کوالیفائنگ مقابلے کے لیے روسی مرد ہاکی ٹیم اتوار کو ملک پہنچ گئی۔کلنگا اسٹیڈیم میں اولمپک کوالیفائنگ مقابلے کھیلے جانے ہیں۔ روسی ٹیم کے کپتان ڈینس شپاچئو نے اپنی ٹیم کے ہندستان پہنچنے پر خوشی کا اظہار کیا۔ ٹیم اس سے پہلے جون میں ایف آئی ایچ سریز فائنلس کیلئے ہندستان دورے پر آئی تھی۔ انہوں نے کہاکہ ہندستان واپس آنا کافی دلچسپ ہے ۔ ہمیں گزشتہ دورے میں کافی مزہ آیا تھا اور یہاں کے پرستار بھی کافی پرجوش ہیں۔ اگرچہ جون میں موسم کافی گرم تھا لیکن امید کرتے ہیں کہ یہاں موسم اس بار اچھا ہوگا اور ہم یہاں حالات کے مطابق خود کو ڈھال لیں گے ۔ آخری بار جب ہندستان اور روس کی ٹیموں کا ایف آئی ایچ سریز فائنلس میں ایک دوسرے سے سامنا ہوا تھا تب میزبان ٹیم سے اسے 0-10 سے شکست کھانی پڑی تھی۔ اگرچہ روسی ٹیم کو اس بار یقین ہے کہ وہ بہتر کارکردگی کرے گی ۔ کپتان نے کہاکہ ہندستان بہت اچھی ٹیم ہے اور ہم سے درجہ بندی میں بھی کافی اوپر ہے ۔ لیکن ہم ان کے خلاف اچھا کھیل دکھانے کے لیے تیار ہیں ہم نے اولمپکس کوالیفکیشن کو ذہن میں رکھتے ہوئے اپنی تیاریاں اسی حساب سے کی ہیں ۔روس کلنگا اسٹیڈیم میں 1 اور 2 نومبر کو ہندستان سے مقابلے میں اترے گی۔
