یواین آئی
ڈھاکہ؍؍ بنگلہ دیشی کرکٹرز نے قومی بورڈ کی طرف سے اپنی زیادہ تر مانگیں تسلیم کئے جانے کے بعد اپنی ہڑتال ختم کر دی ہے جس کے ساتھ ہی صاف ہو گیا ہے کہ ٹیم کا ہندستان دورہ اب شیڈول کے مطابق ہی منعقد ہوگا۔بنگلہ دیشی کرکٹرز نے بدھ دیر رات بنگلہ دیش کرکٹ بورڈ (بي سي بی) کے گھریلو فرسٹ کلاس کرکٹروں کی تنخواہ میں اضافہ سمیت کھلاڑیوں کے کئی مطالبات پر اپنی رضامندی ظاہر کردی ہے ۔ قومی ٹیم کے ٹیسٹ اور ٹوئنٹی 20 کپتان شکیب الحسن نے صحافیوں سے کہاکہ ہماری بورڈ کے ساتھ بات چیت کامیاب رہی۔ بي سي بي کے صدر اور ڈائریکٹرز نے ہم سے ملاقات کر مطالبات کو سنا اور ان پر اتفاق ظاہر کردیا اور انہیں جلد پورا کیا جائے گا۔ بنگلہ دیشی کرکٹرز کی ہڑتال ختم ہونے کے ساتھ ان کے اگلے ماہ سے شروع ہونے والے ہندستانی دورے کو لے کر چل رہے شک کے با دل بھی چھٹ گئے ہیں۔ اس دورے میں دونوں ٹیمیں تین ٹوئنٹی 20 اور دو ٹیسٹ میچوں کی سیریز کھیلیں گی۔ شکیب نے کہاکہ بورڈ نے فرسٹ کلاس کھلاڑیوں کی تنخواہ میں اضافہ کا بھروسہ دیا ہے اور ہم ہفتے کے روز سے کھیلنا شروع کر دیں گے اور ہماری قومی ٹیم کے کھلاڑی ہندستان کے دورے کے لیے 25 اکتوبر سے ہندستان دورے کے لیے کیمپ کا حصہ بنیں گے ۔بي سي بي صدر نظم الحسن نے کہا کہ وہ کھلاڑیوں کے زیادہ تر مطالبات کو پورا کرنے کے لئے قدم اٹھائیں گے ۔ انہوں نے کہاکہ دو مطالبات کو چھوڑ کر ہم نے باقی تمام نو مطالبات کو تسلیم کر لیا ہے ۔ سپریم کورٹ کے وکیل مستفیض الرحمن خان نے پریس کانفرنس میں بنگلہ دیشی کرکٹرز کے مطالبات کی فہرست پڑھ کر سنائی جس میں خواتین کھلاڑیوں کے لیے بہتر ادائیگی کا مطالبہ شامل تھا۔ رحمان نے آسٹریلیا کی مثال دیتے ہوئے کہاکہ بي سي بي نے ایسے انتظام کئے ہیں جس میں پیشہ ورانہ کرکٹروں کو آمدنی کی مناسب ادائیگی کی جائے گی۔بنگلہ دیشی قومی کھلاڑیوں اور فرسٹ کلاس کرکٹرز نے کچھ دن پہلے صحیح تنخواہ ادائیگی کو لے کر ہڑتال کا اعلان کر دیا تھا جس میں قومی ٹیم کے کپتان اورا سٹار آل راؤنڈر شکیب اور دیگر اعلی کھلاڑی بھی شامل ہو گئے تھے ۔ وہیں بین الاقوامی کرکٹروں کی تنظیم نے بھی بنگلہ دیشی کرکٹرز کو اپنی حمایت کا اظہار کیا تھا۔ ادارے کے ایگزیکٹو چیئرمین ٹونی آئرش نے کھلاڑیوں کے تئیں حمایت کرتے ہوئے ان کے مطالبات کی بھی حمایت کی تھی۔
