شاہ رخ خان نے فلمی ہستیوں سے گفتگو کے لئے وزیر اعظم کا شکریہ ادا کیا

نئی دہلی؍؍بالی ووڈ اداکار شاہ رخ خان نے مہاتما گاندھی کے پیغامات کی تشہیر میں فنکاروں کے کردار کے سلسلے میں فلمی شخصیات کے ساتھ تبادلہ خیال کرنے کے لئے وزیر اعظم نریندر مودی کا شکریہ ادا کیا ہے ۔شاہ رخ خان نے سنیچر کی رات ٹویٹر پر کہاکہ ‘‘ہماری میزبانی کرنے اور مہاتما گاندھی کے پیغامات کی تشہیر میں فنکاروں کے کردار کے سلسلے میں فلمی شخصیات کے ساتھ کھلی بات چیت کے لئے شکریہ۔ فلم یونیورسٹی کا خیال بھی کمال کا ہے ’’۔مسٹر مودی نے ہفتہ کے روز اداکاروں شاہ رخ خان، عامر خان اور جیکی شراف، اداکارائیں کنگنا رنوت، سونم کپور اور جیکلین فرنانڈیز اور ہدایت کار راجکمار ہیرانی، امتیاز علی، بونی کپور اور ایکتا کپور سمیت فلم دنیا کی معروف شخصیات سے ملاقات کی اور ان سے گاندھی اور گاندھی ازم پر فلم بنانے کی اپیل کی۔ اس پروگرام کا انعقاد وزیر اعظم کی رہائش گاہ 7، لوک کلیان مارگ پر کیا گیا تھا۔فلمی صنعت کے ارکان کو مدعو کرنے کا مقصد مہاتما گاندھی کے 150 ویں یوم پیدائش کے موقع پر گاندھی اور گاندھی ازم پر فلمیں بنانے کے لئے حوصلہ افزائی کرنا تھا۔ بالی وڈ کی کئی بڑی ہستیاں اس پروگرام میں شامل ہوئیں اور گاندھی جی سے متعلق پروگراموں کے سلسلے میں اپنی تجاویز پیش کیں۔اس دوران وزیراعظم مودی نے کہا کہ گاندھی جی کے خیالات، سادگی کی مثال ہیں۔ ملاقات کے دوران انہوں نے فلمی شخصیات سے ڈانڈی کی گاندھی میوزیم میں دیکھنے کی اپیل کی۔ مسٹر مودی نے کہا کہ ‘‘آپ کو اسٹچیو آف یونٹی بھی جانا چاہئے ، جہاں ملک وبیرونی ممالک سے لوگ آ رہے ہیں’’۔وزیر اعظم نے کہاکہ ‘‘مہاتما گاندھی کے خیالات کی تشہیر کے لئے فلمی دنیا اور ٹیلی ویژن شاندار کام کر رہے ہیں’’۔مسٹر مودی نے اس موقع پر چار ثقافتی ویڈیو بھی ریلیز کئے ۔اداکار عامر خان نے کہاکہ ‘‘باپو کے خیالات کی تشہیر کرنے کے لئے وزیر اعظم مودی کی کوششوں کی میں تعریف کرتا ہوں۔ تخلیقی کام کرنے والے لوگوں کے طور پر ہم بہت کچھ کر سکتے ہیں۔ میں وزیر اعظم مودی کو یقین دلاتا ہوں کہ ہم اس سمت میں کچھ کرنے کی کوشش کریں گے ’’۔شاہ رخ خان نے کہا کہ ‘‘ایک پلیٹ فارم پر سب کو یکجا کرنے کے لئے میں پی ایم مودی کا شکریہ ادا کرتا ہوں۔ مجھے لگتا ہے کہ ہمیں ہندوستان اور دنیا کو ایک بار پھر گاندھی جی سے واقف کرانا ہوگا’’۔مشہور فلم ساز آنند ایل رائے نے کہاکہ ‘‘مسٹر مودی نے گاندھی جی کے نظریات کو مقبول بنانے میں ہمیں شامل کرکے اس کے تئیں ذمہ داری کے جذبے کو شامل کیا ہے ’’۔