آر۔ایس پورہ میں اندھاقتل معاملہ،8دِنوں میں حل،ملزم گرفتار
پریتی مہاجن
جموں؍؍ایک حیران کن واقعہ میں بیٹے نے آر ایس پورہ میں اپنے 58 سالہ والد کو موت کے گھاٹ اُتار کر تاروں سے اس کی نعش باندھ کر نہر میں پھینک دیسب ڈویژنل پولیس آر ایس پورہ نے 58 سالہ مقتول وجئے کمار ولد دیس راج ساکنہ چک بانہ پولیس سٹیشن بشناہ کے اس اندھے قتل کیس کو 8دِنوں میںحل کیا ہے۔یہاں ڈی پی ایل میں جموں کے ایس پی ہیڈکوارٹر فاروق اعجاز قیصر کو میڈیا کوجانکاری دیتے ہوئے بتایاکہ اس معاملے کے حقائق یہ ہیں کہ 18ستمبر2019کو پولیس تھانہ آر ایس پورہ میں اطلاع ملی تھی کہ کپڑوں کی چادر میں لپٹی ہوئی ایک نامعلوم لاش گاؤں رائے پور گوجران ، آر ایس پورہ میںنہر سے ملی ہے۔ انہوں نے بتایا کہ اسی بنا پر سیکشن 174 سی آر پی سی کے تحت تحقیقات کا آغاز کیا گیا تھا اور انکوائری کے دوران پتہ چلا ہے کہ نامعلوم افراد کے ذریعہ لاش کو سر سے پیر تک بجلی کے تار سے باندھا گیا ہے۔ انہوں نے مزید بتایا کہ اس کے نتیجے میں ، مقدمہ کی ایف آئی آر نمبر 171/2019 تحت سیکشن 302/201 آر پی سی میں تبدیل کردیا گیا تھا اور انسپکٹر راجیشور سنگھ ، ایس ایچ او پی ایس آر ایس پورہ نے تفتیش کی۔ فاروق قیصر نے بتایا کہ نعش کو مردہ خانے کے کمرے ، آر ایس پورہ میں منتقل کردیا گیا تھا اور پوسٹ مارٹم کرنے کے بعد اسے شناخت کے لئے وہیں رکھا گیا تھا۔ 26ستمبر2019کو مردہ خانے میں اس کی شناخت وجے کمار ولد دیس راج ساکنہ و چک بانہ ، بشناہ کے طورپرکی گئی ،جس کیساتھ ہی اس تفتیش نے زور پکڑ لیا۔ انہوں نے بتایا کہ مشتبہ افراد کو پکڑ لیا گیا اور ان سے پوچھ گچھ کی گئی اور جلد ہی پولیس 24 سال کی ترون کمار تک پہنچنے میں کامیاب ہوگئی جو متوفی کا بیٹا بھی تھا۔ فارق قیصرنے بتایاکہ اُنہوں نے ایک خصوصی تحقیقاتیٹیم تشکیل دی جس کی سربراہی محترمہ شیمانبی قصبہ ، اے ایس پی ،آر ایس پورہ کودی گئی اوران کیساتھ ایس ایچ او بشنا انسپکٹر دیپک پٹھانیہ اور ایس ایچ او آر ایس پورہ انسپکٹر راجیشور سنگھ بطور ممبران شامل کئے گئے۔ جلد ہی ایس آئی ٹی نے اس معاملے میں کامیابی پائی اورملزم ترون کمار کو 04اکتوبر2019کو گرفتار کرلیا گیا۔ان کا مزید کہنا تھا کہ تفتیش کے دوران یہ بات سامنے آئی ہے کہ متوفی نے اپنے بیٹے سے اچھے تعلقات نہیں رکھے تھے اور 12,13ستمبر2019کی درمیانی شب کو دونوں نے آدھی رات کو اپنی رہائش گاہ پر سونے کی زنجیر سے متعلق جھگڑا کیا تھا۔ جو زنجیر ملزم نے مقتول کودی تھی اور وہ اب اسے واپس نہیں کر رہا تھا اور اس کے بعد ہاتھا پائی میں ، متوفی کو ملزم نے پیٹا تھا جس کے نتیجے میں اس کی موت واقع ہوگئی۔ اگلی صبح 13ستمبر2019کو ملزم نے اپنی ویگن آر کار میں مردہ لاش بھری اور اسے گائوںدھراب تحت پولیس تھانہ ستواری کے مقام پر نہر میں پھینک کر رفع دفع کر دیا۔فاروق قیصر نے میڈیا کو بتایا کہ ملزم کے انکشافات پر پولیس نے متوفی کے ذریعے استعمال ہونے والے موبائل فون کی بیٹری اور میموری کارڈ برآمد کیا ہے جس کے ساتھ ہی ویگن آرکاربھی استعمال کی گئی جو لاش کو نکالنے کے لئے استعمال کیا گیا تھا۔ سم کارڈ کے ساتھ مقتول سے تعلق رکھنے والا موبائل فون بھی اسی نہر میں پھینکاگیا ۔ اُنہوں نے کہاکہ اس معاملے میں مزید تفتیش جاری ہے۔
