موجودہ مودی حکومت کو ہٹانا ضروری:شردپوار
یواین آئی
ممبئی؍؍نیشنلسٹ کانگریس کے قومی صدر اور سابق مرکزی وزیر شردپوار نے آج کہاکہ ملک کی جمہوریت اور سیکولرزم کی بقائ کے کیلئے موجودہ مودی حکومت کو اقتدار سے بے دخل کرنا انتہائی ضروری ہے ،کیونکہ اس کی وجہ سے ملک میں بے یقینی کی صورتحال ہے ۔شردپوارنے شمالی ممبئی کے بوریولی علاقہ میں ایک انتخابی جلسے سے خطاب کرتے ہوئے مزید کہاکہ ہندوستان مشترکہ گنگا جمنی تہذیب اور تمدن کا ملک ہے ،جہاں آپسی بھائی چارہ اور ہم۔آہنگی کی وجہ سے لوگ ایک دوسرے کے ساتھ زندگی گزار رہے ہیں،لیکن حالیہ دنوں میں ارباب اقتدار نے انہیں آپس میں لڑانے اور تفرقہ ڈالنے کی پالیسی اپنا رکھی ہے اور عوام بے اطمینانی اور بے چینی کا شکار ہے ۔انہوں نے کہا کہ نوٹ بندی،جی ایس ٹی ،اور مہنگائی کی وجہ سے عام آدمی سخت پریشان ہے اور وہ چاہتا ہے کہ تبدیلی واقع ہو ،اس کے لیے رائے دہندگان کو اپنے ووٹوں کو دانشمندی اور سمجھداری سے استعمال کرنا ہوگا تاکہ اس ظالم،بدعنوان اور تفرقہ ڈالنے کی پالیسی اختیار کرنے والی حکومت کو بے دخل کردیا جائے ۔شردپوار نے کہا کہ اس بار بی جے پی کی قیادت میں حکومت کو بھرپور جواب دینا ہوگا۔اس موقع پر این سی پی کے راجیہ سبھا ممبراور سنیئر وکیل ایڈوکیٹ مجید میمن نے ابھی اپنے خیالات کا اظہار کرتے ہوئے کہا کہ عام انتخابات کے ذریعہ ہم بھر پور جواب دے سکتے ہیں کیونکہ فرقہ پرستوں کو شہ دینے کے لیے برسراقتدار پارٹی ہر طرح کے حربے استعمال کررہی ہے ،لیکن ہمیں سوچ سمجھ کر ووٹ کا استعمال کرنا چاہئے اور سیکولرعناصر کو کامیابی دلانی ہوگی ،انتخابی جلسہ میں این سی پی اور کانگریس کے متعدد لیڈران موجودتھے
