یو این این
نئی دہلی سپریم کورٹ نے ملک کی تمام مساجد میں خواتین کو داخل ہونے کی اجازت دینے کی درخواست پر حکومت سے جواب طلب کرلیا۔ عدالت عظمی میں پونے سے تعلق رکھنے والے مسلمان میاں بیوی نے درخواست دائر کی۔ذرائع ابلاغ کے مطابق درخواست گزاروں نے کہا کہ بھارت میں خواتین کو تمام مساجد میں داخل ہونے اور نماز کی ادائیگی کی اجازت دی جائے، قرآن و سنت سے ایسی کوئی مثال نہیں ملتی کہ مساجد میں خواتین کو نماز پڑھنے سے روکا گیا ہو، مکے اور مدینے میں بھی خواتین کو مساجد میں نماز پڑھنے کی اجازت ہے، لہذا بھارتی مساجد میں بھی خواتین کے داخلے پر پابندی کو غیر قانونی و غیر آئینی قرار دیا جائے۔درخواست گزاروں نے کہا کہ ملک میں صرف جماعت اسلامی اور کیرالا ندو المجاہدین کے تحت چلنے والی مساجد میں خواتین کو نماز پڑھنے کی اجازت ہے لیکن دوسرے مسلک کی مساجد میں پابندی ہے۔سپریم کورٹ نے سبری مالا مندر کیس میں فیصلے کو مدنظر رکھتے ہوئے درخواست کو سماعت کے لیے منظور کرتے ہوئے وفاقی حکومت سے جواب کرلیا۔
