ہائی وے پابندی محمد تغلق جیسے شخص کا کارنامہ: غلام نبی آزاد
کہابی جے پی کو دفعہ370منسوخ کرنے کی اجازت نہیں دی جائے گئی :جب تک کانگریس بھارت میں ہے دفعہ370محفوظ ہے
شاہ ہلال
اننت ناگراجیہ سبھا میں حزب اختلاف کے قائد اور سینئر کانگریس لیڈر غلام نبی آزاد نے کہا کہ نریندر مودی ظالم وزیر اعظم ہیں جنہیں انسانیت پر کوئی بھروسہ نہیں۔ انہوں نے کہا کہ نریندر مودی کے دور اقتدار میں فوج پر سب سے زیادہ حملے ہوئے اور سب سے زیادہ تعداد میں فوجی جوان مارے گئے۔غلام نبی آزاد نے منگل کے روز ضلع اننت ناگ کے لارنو ککرناگ میں اننت ناگ پارلیمانی حلقہ انتخاب کے پارٹی امیدوار غلام احمد میر کے حق میں منعقدہ انتخابی جلسے سے خطاب کے دوران وزیر اعظم مودی کو شدید تنقید کا نشانہ بناتے ہوئے کہا ‘ہم نے اٹل بہاری واجپئی کو بھی دیکھا۔ لیکن وہ مودی کی طرح ظالم وزیر اعظم نہیں تھا۔ انہیں انسانیت پر بھروسہ نہیں۔ انہیں انسانیت کی کوئی قدر نہیں۔ آرمی پر سب سے زیادہ حملے مودی صاحب کے وقت میں ہی ہوئے۔ سب سے زیادہ فورسز اہلکار مودی کے دور اقتدار میں ہی مارے گئے۔ کیا وجہ ہے کہ مودی کے وقت میں کشمیر میں زیادہ فوجی مارے گئے؟’۔انتخابی جلسے کے اختتام پر مسٹر آزاد نے نامہ نگاروں کے سوالات کا جواب دیتے ہوئے کہا کہ دفعہ 370 ہمیشہ قائم و دائم رہے گا۔ ان کا کہنا تھا ‘مجھے افسوس کے ساتھ کہنا پڑتا ہے کہ ارون جیٹلی صاحب اتنی ڈگریاں خراب کیوں کررہے ہیں۔ اگر انہیں نہیں معلوم کہ دفعہ 370 کی بدولت جموں وکشمیر کا بھارت سے کیا تعلق ہے تو میں سمجھتا ہوں کہ انہوں نے اپنی پوری پڑھائی ضائع کی ہے۔ جموں وکشمیر بھارت کا اٹوٹ انگ ہے۔ جب تک انسانیت زندہ ہے دفعہ 370 تب تک قائم رہے گا’۔آزادنے کہا کہ بی جے پی کے دور حکومت میں ریاست میں سب سے زیادہ حالات خراب ہوئے یہاں کے پڑھے لکھے نوجوان بی جے پی کی غلط پالسیوں کے سبب ملی ٹنسی میں شامل ہو رہے ہیں ۔ملک کے عوام عدم تحفظ کے شکار ہیں ،خواتین گھروں سے باہر نکلنے میں خوف محسوس کر رہے ہیں ،اُنہوں نے سرینگر جموں شاہراہ کو ہفتہ میں دو روز کے لئے بند رکھنے پر بھی سخت نقط چینی کی اور اس سے گورنر انتظامیہ کا آمرانہ فیصلہ قرار دیا ہے ۔غلام نبی آزاد نے کشمیر شاہراہ پر سویلین ٹریفک پر عائد ہفتے میں دو روزہ پابندی کی سخت مخالفت کرتے ہوئے کہا کہ ایسا حکم نامہ محمد تغلق جیسا شخص ہی جاری کرسکتا ہے۔ان کا کہنا تھا ‘ایسا حکم نامہ صرف محمد تغلق جیسا آدمی ہی جاری کرسکتا ہے۔ مودی کے وقت میں کچھ بھی ہوسکتا ہے۔ یہ ڈکٹیٹرشپ کی واپسی ہے۔ جموں وکشمیر میں جو بھی قانون لگانا چاہتے ہیں، لگا لیتے ہیں۔ ذرا ایسا کوئی قانون دلی یا گجرات میں لگائے۔ اگر کسی اور جگہ 48 گھنٹے ٹریفک بند کریں گے تو وزیر اعظم کی کرسی جائے گی۔ گورنر انتظامیہ اور سرکاری کو ہوش میں آنا چاہیے۔ شاہراہ پر پابندی بہت غلط فیصلہ ہے۔ پہلے تو گولیوں سے لوگ مرتے تھے اب سڑکیں بند کرنے سے مرتے ہیں’۔اس موقع پر اننت ناگ پارلیمانی نشست کے اُمیدوار غلام احمد میر ،سابق وزیر پیر زادہ محمد سعید اور گلزار احمد وانی نے بھی خطاب کیا ۔
