سری نگرسابق آئی اے ایس آفیسر ڈاکٹر شاہ فیصل پلوامہ خودکش دھماکے کے تناظر میں ملک کی مختلف ریاستوں کے کالجوں اور یونیورسٹیوں میں زیر تعلیم کشمیری طالب علموں کے بہتر اور محفوظ مستقبل کے لئے ایک مربوط منصوبہ مرتب کرنے کے لئے کشمیر واپس لوٹنے والے طلباءکے ساتھ گفت وشنید کا سلسلہ شروع کریں گے۔ ڈاکٹر شاہ فیصل نے اپنے ایک فیس بک پوسٹ میں کشمیر واپس لوٹنے والے طلباءکے ساتھ بات چیت کا سلسلہ شروع کرنے کے مقاصد بیان کرتے ہوئے کہا کہ کشمیری طلباءکے ساتھ ملک کی مختلف ریاستوں میں ہوئے ہراسانیوں کے واقعات کے بارےمیں ڈاٹا جمع کیا جائے گا۔ انہوں نے کہا کہ طلباءکے ساتھ ملاقاتوں کے دوران یہ بات سمجھنے کی کوشش کی جائے گی کہ آیا ان طلبا کے لئے بیرون ریاست تحصیل تعلیم کے لئے واپس جانا محفوظ ہوگا یا نہیں۔ انہوں نے کہا کہ معطل کئے گئے طلباءکی بحالی یا انہیں دوسرے کالجوں یا یونیورسٹوں میں داخلہ دیے جانے پر بھی ایک حکمت عملی مرتب کی جائے گی۔ فیصل نے کہا کہ مقامی سطح پر تعلیمی انفراسٹرکچر کو بہتر بنانے کے لئے بھی ایک مربوط لائحہ عمل مرتب کیا جائے گا۔
