تمام افسروں اور ملازموں کو شرکت کرنے کی ہدایت
یواین آئی
جموں؍جموں وکشمیر حکومت نے اپنے تمام ملازموں سے یہاں مولانا آزاد اسٹیڈیم میں منعقد ہونے والی یوم جمہوریہ کی تقریب میں ڈیوٹی کے ایک حصہ کے بطور شرکت کرنے کی ہدایت دی ہے۔سر کیولر کے مطابق ملازمین کو مولانا آزاد اسٹیڈیم جموں میں 29 جنوری کی شام ساڑھے چار بجے منعقد ہونے والی ’بیٹنگ ریٹریٹ‘ تقریب میں بھی شرکت کرنے کی ہدایت دی گئی ہے۔منگل کے روز جاری سرکیولر میں کہا گیا: ’جموں میں تعینات حکومت اور پبلک سیکٹر انڈر ٹیکنگ کے افسروں اور اہلکاروں سے کہا جاتا ہے کہ وہ یوم جمہوریہ کی تقریب میں اپنی ڈیوٹی کے ایک حصے کے بطور شرکت کریں‘۔تمام محکموں کے افسروں اور پبلک سیکٹر انڈر ٹیکنگ کے چیف ایگزیکیٹوز سے کہا گیا کہ وہ یوم جمہوریہ کی تقریب میں اپنی اور اپنے ماتحت ملازموں کی شرکت کو یقینی بنائیں۔ایک علاحدہ سرکیولر کے مطابق یوم جمہوریہ تقریبات کی ’بیٹنگ ریٹریٹ‘ تقریب مولانا آزاد اسٹیڈیم جموں میں 29 جنوری شام ساڑھے چار بجے منعقد ہونے والی ہے جموں کے تمام محکموں کے افسروں اور اہلکاروں کو اس تقریب میں بھی شرکت کرنے کی ہدایت دی گئی ہے۔بتادیں کہ یوم جمہوریہ کی سب سے بڑی تقریب مولانا آزاد اسٹیڈیم جموں میں منعقد ہو گی جس کی صدارت جموں وکشمیر کے لیفٹیننٹ گورنر منوج سنہا کریں گے اور سلامی لیں گے۔
