’ ہم پختہ یقین رکھتے ہیں کہ جنگ کا سہارا لینا پائیدار حل نہیں ہے‘

جموں و کشمیر میں امن کی بحالی کا واحد حل تعمیری بات چیت ہے: جاوید رانا
لازوال ڈیسک

مینڈھر؍؍جموں و کشمیر نیشنل کانفرنس پیر پنجال زون کے صدر اور سابق قانون ساز جاوید احمد رانا نے اس بات کا اعادہ کیا کہ جموں وکشمیر میں امن کی بحالی کا واحد حل تعمیری بات چیت ہے ۔انہوں نے کہاکہ بات چیت ہی واحد قابل عمل حل ہے جس سے اس حصے کو واپس لیا جاسکتا ہے جو اس وقت پاکستان کے غیر قانونی قبضے میں ہے۔رانا نے ڈاکٹر فاروق عبداللہ کی طرف سے پاکستان کے ساتھ مذاکرات کی وکالت کرنے والے بیان کا خیرمقدم کرتے ہوئے اس کی حمایت کرتے ہوئے اس بات پر روشنی ڈالی کہ نیشنل کانفرنس نے اس پیچیدہ مسائل کو حل کرنے کے ایک ذریعہ کے طور پر پرامن مذاکرات کی مسلسل وکالت کی ہے۔ انہوں نے روشنی ڈالی کہ پیر پنجال کا 40 فیصد سے زائد علاقہ پاکستان کے غیر قانونی قبضے میں ہے۔ انہوں نے اس بات پر زور دیا کہ طویل عرصے سے جاری علاقائی تنازع کو حل کرنے کے ساتھ ساتھ خطے میں امن و استحکام کی بحالی کے لیے بات چیت سب سے اہم ہے۔رانا نے کہاکہ پاکستان کے ساتھ بامعنی بات چیت میں شامل ہوئے بغیر، بھارت ہمارے علاقے کو ان کے غیر قانونی قبضے سے کیسے واپس لے سکتا ہے؟ انہوں نے کہاکہ ہم پختہ یقین رکھتے ہیں کہ جنگ کا سہارا لینا پائیدار حل نہیں ہے۔ انہوں نے ماضی کے تنازعات کے تباہ کن نتائج پر زور دیا اور دیرینہ مسائل کا پرامن حل تلاش کرنے کی اہمیت پر زور دیا۔رانا نے آگے بڑھنے کا راستہ تجویز کرتے ہوئے کہاکہ جس طرح بھارت چین کے ساتھ سفارتی بات چیت میں مصروف ہے، اسی طرح پاکستان کے ساتھ بات چیت بھی ایک ترجیح ہونی چاہیے۔انہوں نے کہاکہ ہماری علاقائی سالمیت سب سے اہم ہے، اور اس پیچیدہ مسئلے کو حل کرنے کے لیے بات چیت کو سب سے مؤثر ذریعہ کے طور پر آگے بڑھانا چاہیے۔ انہوں نے زور دے کر کہا کہ نیشنل کانفرنس ہمارے علاقے کو دوبارہ حاصل کرنا چاہتی ہے اور بھارت کے لیے یہ ضروری ہے کہ وہ سفارتی مذاکرات پر توجہ مرکوز کرے اور پاکستان اور چین دونوں کے غیر قانونی قبضے والے علاقوں پر ہماری خودمختاری کو بحال کرنے کے لیے پرامن ذرائع استعمال کرے۔