شمالی ریلوے کی بڑی کامیابی: غیر قانونی سونا، چاندی اور نقدی کی تاریخی برآمدگی
جان محمد
جموں؍؍’’ریلوے سیکیورٹی فورس (آر پی ایف) نے ہریانہ اور جموں و کشمیر اسمبلی انتخابات کے دوران غیر قانونی اشیاء کی نقل و حمل کے خلاف ایک بڑی کارروائی کرتے ہوئے 5 کروڑ روپے سے زائد مالیت کا سونا، چاندی، نقدی اور دیگر قیمتی سامان ضبط کر لیا۔ یہ تاریخی ضبطی شمالی ریلوے کے مختلف اسٹیشنز پر ایک روزہ مہم کے دوران عمل میں آئی، جس میں جدید چیکنگ کے طریقے اپناتے ہوئے غیر قانونی کاروبار کا بڑا نیٹ ورک بے نقاب ہوا۔‘‘
تفصیلات دیتے ہوئے شمالی ریلوے کے حکام نے بتایاکہ ہریانہ اور جموں و کشمیر اسمبلی انتخابات کے پیش نظر ریل کے ذریعے غیر قانونی سونا، چاندی، شراب وغیرہ اور نقدی کی منتقلی کو روکنے کے لیے، ڈائریکٹر جنرل ریلوے سیکیورٹی فورس کی ہدایت پر شمالی ریلوے میں انسپکٹر جنرل ریلوے سیکیورٹی فورس کی نگرانی میں مسلسل کارروائیاں کی جا رہی ہیں۔ ریلوے حکام نے بتایاکہ 5 ستمبر 2024 کو شمالی ریلوے کے نئی دہلی، انبالہ اور بٹھنڈا اسٹیشنز پر سخت تلاشی مہم چلا کر 5,74,61,114 روپے کی غیر قانونی اشیاء اور نقدی کی غیر معمولی ضبطی کی گئی۔
چیف پبلک ریلیشن آفیسر شمالی ریلوے نے بتایاکہ 5 ستمبر 2024 کو، جاوید خان، انسپکٹر انچارج، ریلوے سیکیورٹی فورس انبالہ کینٹ اور ان کی ٹیم نے ٹرین نمبر 12926 پچھم ایکسپریس کی چیکنگ کے دوران دو ٹرالی بیگز سے بالترتیب 2.00 کلو گرام سونے کے زیورات اور دیگر مصنوعی زیورات جن کی قیمت 1,51,60,000 روپے ہے اور 5,00,000 روپے نقد برآمد کیے۔ برآمد شدہ زیورات اور نقدی کے حوالے سے مزید کارروائی انکم ٹیکس ڈیپارٹمنٹ اور الیکشن کمیٹی انبالہ کر رہی ہے۔ اس کے علاوہ، ریلوے سیکیورٹی فورس بٹھنڈا نے ٹرین نمبر 12455 بیکانیر ایکسپریس کے جنرل کوچ کی چیکنگ کے دوران چھ افراد سے 16,01,499 روپے کی قیمت کے 12 لیپ ٹاپ اور دیگر برقی آلات برآمد کیے۔ اس حوالے سے سیلز ٹیکس اور انکم ٹیکس ڈیپارٹمنٹ کو مطلع کیا گیا ہے اور ان چھ افراد کے خلاف ریلوے ایکٹ کے تحت مقدمہ درج کیا گیا ہے۔
https://www.rrcnr.org/
تاریخ 5 ستمبر 2024 کو امبیکا ناتھ مشرا، انسپکٹر جنرل شمالی ریلوے کی قیادت میں، سچن بھالودے، ڈپٹی انسپکٹر جنرل شمالی ریلوے، جوتی مانی، ڈویڑنل سیکیورٹی کمشنر ریلوے سیکیورٹی فورس دہلی، ڈی کے چوہان، اسسٹنٹ سیکیورٹی کمشنر/ہیڈ کوارٹر دہلی ڈویژن، مہیش سینی، اسسٹنٹ سیکیورٹی کمشنر نئی دہلی، نریندر کمار انچارج انسپکٹر ریلوے سیکیورٹی فورس پوسٹ نئی دہلی، سندیپ کمار، انسپکٹر دہلی ریزرو اور محترمہ سونیا، انسپکٹر سیکنڈ، نئی دہلی اور ان کی ٹیم نے ایک خاص مخبر کی اطلاع پر ٹرین نمبر 12381 پورو ایکسپریس، ٹرین نمبر 12951 ممبئی راجدھانی ایکسپریس اور ٹرین نمبر 12925 پچھم ایکسپریس کے پارسل وین سے 24 پیکجز ضبط کیے، جنہیں ریلوے سیکیورٹی فورس نئی دہلی کی ٹیم نے چیک کیا۔ ان پیکجز میں 498 گرام سونے کی بار جس کی قیمت تقریباً 36,70,260 روپے ہے، 365.704 کلوگرام چاندی جس کی قیمت تقریباً 2,79,56,995 روپے ہے اور 85,72,360 روپے نقد (کل قیمت 4,01,99,615 روپے) برآمد کیے گئے۔ مزید کارروائی انکم ٹیکس ڈیپارٹمنٹ کے ذریعے کی جا رہی ہے۔ یہ شمالی ریلوے کی ریلوے سیکیورٹی فورس کی جانب سے ایک دن میں کی گئی سب سے بڑی ضبطی ہے۔
