بھاری اسلحہ وگولہ بارودبرآمد، تلاشی آپریشن جاری ،صوبہ بھر میں ہائی الرٹ جاری
حفیظ قریشی/یواین آئی
کٹھوعہ/جموں؍؍ایڈیشنل ڈائریکٹر جنرل آف پولیس جموں رینج آنند جین نے بدھ کے روز کہاکہ کٹھوعہ کے ہیرا نگر علاقے میں سیکورٹی فورسز کے ساتھ تصادم میں دو ملی ٹینٹ مارے گئے۔انہوں نے کہاکہ علاقے میں مزید ملی ٹینٹ موجود ہو سکتے ہیں جس کے پیش نظر تلاشی آپریشن کا دائرہ مزید کئی علاقوں تک وسیع کیا گیا ہے اس تصادم میں زخمی ہواسی آرپی ایف کاایک جوان زخموں کی تاب نہ لاتے ہوئے جامِ شہادت نوش فرماگیا ہے۔
کٹھوعہ میں نامہ نگاروں سے بات چیت کے دوران ایڈیشنل ڈائریکٹر جنرل آف پولیس آنند جین نے بتایا کہ سیدا سکھل گائوں میں سیکورٹی فورسز کے ساتھ تصادم میں دو ملی ٹینٹ ہلاک ہوئے ہیں۔انہوں نے بتایا کہ منگل کی شام کٹھوعہ کے سیدا سکھل گائوں میں سیکورٹی فورسز اور ملی ٹینٹوں کے مابین تصادم شروع ہوا جس دوران ایک سی آر پی ایف جوان گولیاں لگنے سے زخمی ہوا اور بعد ازاں ہسپتال میں وہ جانبر نہ ہو سکا۔
انہوں نے کہاکہ ابتدائی فائرنگ میں ایک دہشت گرد مارا گیا جبکہ اس کا ساتھی پاس کے جنگل کی طرف بھاگ گیا تاہم سیکورٹی فورسز نے رات بھر اس علاقے میں تلاشی آپریشن جاری رکھا اور بدھ کی صبح ایک مختصر تصادم کے دوران مفرور ملی ٹینٹ کو بھی مار گرایا گیا۔انہوں نے کہاکہ مہلوکین کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کرکے ضبط کیا گیا۔
اے ڈی جی پی نے بتایا کہ مذکورہ گروپ حالیہ دنوں میں ہی دراندازی کے ذریعے اس طرف آنے میں کامیاب ہوا ہے۔انہوں نے مزید بتایا کہ علاقے میں مزید ملی ٹینٹ موجود ہو سکتے ہیں جس کے پیش نظر کئی علاقوں میں بھی تلاشی آپریشن لانچ کیا گیا ہے۔آنند جین نے کہا کہ مہلوک ملی ٹینٹوں کے قبضے سے امرکی ساخت کی رائفل بھی برآمد کرکے ضبط کی گئی ہے۔جموں صوبے میں بڑھتے ہوئے ملی ٹینٹ حملوں کے پیش نظر ہائی الرٹ جاری کیا گیا ہے۔
وہیں سیکورٹی فورسز نے جموں وکشمیر کے ضلع کٹھوعہ کے ہیرا نگر علاقے میں اسلحہ و گولہ بارود کی بھاری کھیپ بر آمد کرنے کا دعویٰ کیا ہے۔بتادیں کہ کٹھوعہ کے سیدا سکھل گاوں میں درمیانی شب ملی ٹینٹوں اور سیکورٹی فورسز کے مابین شدید گولیوں کا تبادلہ ہوا جس دوران سی آر پی ایف جوان جس کی شناخت کانسٹیبل کبیر داس کے بطور ہوئی جاں بحق اور ایئک ملی ٹنٹ ہلاک ہوا ہے۔پولیس ذرائع نے بتایا کہ سیکورٹی فورسز نے تلاشی آپریشن کے دوران کٹھوعہ کے ہیرا نگر علاقے میں اسلحہ و گولہ بارود کی بڑی کھیپ بر آمد کی ہے۔
انہوں نے کہا کہ بر آمد شدہ اسلحہ و گولہ بارود میں 3 میگزین جن میں 30 گولیاں ہیں، ایک میگزین جس میں 24 گولیاں ہیں، ایک پالی تھین بیگ میں رکھی گئی 75 گولیاں، تین گرینیڈ، ایک لاکھ روپیے نقدی، پاکستانی ساخت کے چاکلیٹ، خشک چنا اور چپاتیاں، پاکستانی ساخت کی دوائیاں، اے 4 بیٹری سیلوں کے دو پیک اور ایک ہینڈ سیٹ شامل ہیں۔دریں اثنا ہیرا نگر میں تلاشی آپریشن وسیع پیمانے پر جاری ہے۔
