سلطان الحق شہیدی، رفیق مسعودی کی والدہ، سجاد پونچھی اورآفاق مرزا کو خراجِ عقیدت
جمیل انصاری
سرینگر؍؍جموں اینڈ کشمیر اکیڈیمی آف آرٹ کلچر اینڈ لینگویجز کے اہتمام سے کلچرل اکیڈیمی کے صحن میں اکیڈیمی ملازمین کی ایک تعزیتی میٹنگ منعقد ہوئی۔ میٹنگ میں وادی کے نامور ادیب، شاعر اور ترجمہ کار سلطان الحق شہیدی، سابق سیکریٹری کلچرل اکیڈیمی ڈاکٹر رفیق مسعودی کی والدہ، اردو اور پہاڑی زبان کے شاعر سجاد پونچھی اور آفاق مرزاکے انتقال پر گہرے رنج و غم کا اظہار کیا گیا اور مرحومین کے ایصالِ ثواب کے لئے دعائے مغفرت اور فاتحہ خوانی کی گئی اور پسماندگان کے ساتھ ہمدردی کا اظہار کیا۔ تعزیتی اجلاس میں ڈاکٹر فاروق انوار مرزا، ڈاکٹر عابد احمد، جاوید اقبال خان اور سلیم سالک نے مرحومین کے کارناموں پر اپنے خیالات کا اظہار کیا۔ تعزیتی میٹنگ میں سلیکشن گریڈ ایڈیٹر مفتی شفیق الرحمان نے مرحومین کے حق میں اجتماعی فاتحہ خوانی انجام دی۔
