سری نگر، // وادی کشمیر میں برف و باراں کے بعد موسم میں بتدریج بہتری واقع ہو رہی ہے اور ہفتے کو صبح سے ہی موسم نہ صرف خشک رہا بلکہ ہلکی دھوپ بھی چھائی رہی۔
جمعہ کے روز وادی کے پہاڑی علاقوں میں برف باری اور میدانی علاقوں میں بارشوں کے باعث نہ صرف درجہ حرارت میں نمایاں کمی واقع ہوئی بلکہ سری نگر – جموں قومی شاہراہ کے علاوہ کئی سڑکوں پر ٹریفک معطل ہوگیا۔
محکمہ موسمیات کے ایک ترجمان نے بتایا کہ وادی میں اگلے چوبیس گھنٹوں کے دوران موسم جزوی طور پر آلود مگر خشک رہنے کا امکان ہے۔
انہوں نے کہا وادی میں 19 نومبر تک موسم خشک رہنے کی توقع ہے۔
ان کا کہنا تھا کہ اس دوران وادی میں دن کے درجہ حرارت میں اضافہ درج ہوسکتا ہے تاہم رات کے دوران سردی قدرے بڑھ سکتی ہے۔
ان کا کہنا تھا کہ گرمائی دارلحکومت سری نگر میں گذشتہ چوبیس گھنٹوں کے دوران 9.2 ملی میٹر بارش ریکارڈ ہوئی ہے جبکہ قاضی گنڈ میں 31.4 ملی میٹر،پہلگام میں 7.2 ملی میٹر،کپوارہ میں 29.8 ملی میٹر، کوکرناگ میں 5.8 ملی میٹر اور گلمرگ میں 22.2 ملی میٹر بارش ریکارڈ ہوئی ہے۔
دریں اثنا سری نگر میں کم سے کم درجہ حرارت 4.2 ڈگری سینٹی گریڈ ریکارڈ کیا گیا۔
وادی کے شہرہ آفاق سیاحتی مقام گلمرگ میں کم سے کم درجہ حرارت منفی1.5 ڈگری سینٹی گریڈ ریکارڈ کیا گیا جبکہ وادی کے دوسرے مشہور سیاحتی مقام پہلگام میں کم سے کم درجہ حرارت 2.2 ڈگری سینٹی گریڈ ریکارڈ کیا گیا۔
سرحدی ضلع کپوارہ میں کم سے کم درجہ حرارت 4.2 ڈگری سینٹی گریڈ ریکارڈ کیا گیا جبکہ گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 3.6 ڈگری سینٹی گریڈ ریکارڈ کیا گیا۔
