کہا جموں و کشمیر میں لوگوں کو درپیش مشکلات سے آگاہ ہیں اور ہر مسئلے کے حل کو یقینی بنائیں گے
لازوال ڈیسک
سانبہ؍؍جے کے پی سی سی کے ورکنگ صدر رمن بھلا نے آج حکمراں بی جے پی کی جموں و کشمیر اور اس کے لوگوں کے بارے میں پالیسیوں پر تنقید کی۔ وہ سابق وزیر یشپال کنڈل کے زیر اہتمام ضلع سانبہ کے رام گڑھ حلقہ کے گاؤں پکھری، کیسو میں ایک عوامی اجتماع سے تبادلہ خیال کر رہے تھے، جہاں لوگوں اور پارٹی کارکنوں نے ان کا پرتپاک استقبال کیا۔ اس موقع پر موجود لوگوں میں ڈی ڈی سی ممبر ترنجیت سنگھ ٹونی، ضلع سانبہ کے صدر سنجیو شرما و دیگران موجود تھے ۔بھلا نے بی جے پی پر طنز کرتے ہوئے الزام لگایا کہ دہلی کی حکمران جماعت جموں و کشمیر کے لوگوں کے آئینی اور سیاسی حقوق کو پامال کرنے کی کوشش کر رہی ہے۔ انہوں نے کہاکہ یہ دیکھ کر پریشان کن ہے کہ جموں و کشمیر کے حقوق اور مفادات کو مجروح کرنے والے نئے جارحانہ قوانین کو یہاں ہر گزرتے دن کے ساتھ نافذ کیا جا رہا ہے۔ انہوں نے جموں و کشمیر کو ریاست کا درجہ بحال نہ کرنے اور یوٹی میں اسمبلی انتخابات نہ کرانے پر بھی بی جے پی حکومت کی مذمت کی۔بھلا نے اس موقع پریقین دلایا کہ کانگریس جموں و کشمیر کے مفادات کے تحفظ کے لیے کوئی کسر نہیں چھوڑے گی۔ انہوں نے کہا کہ کانگریس ایک پرامن اور خوشحال جموں و کشمیر کے لیے کام کر رہی ہے۔انہوں نے کہاکہ امن اور خوشحالی بالآخر لوگوں کو سیاسی اور معاشی طور پر بااختیار بنائے گی۔تاہم، کانگریس پارٹی کو اس کے عوام دوست ایجنڈے کو صحیح طریقے سے نافذ کرنے کو یقینی بنانے کے لیے مکمل عوامی حمایت کی ضرورت ہے۔بھلا نے کہا کہ انہوں نے بی جے پی کی حکمرانی دیکھی ہے جس میں کوئی ترقی نہیں ہوئی بلکہ انتخابی فہرستوں کی منسوخی سے بے روزگاری میں کئی گنا اضافہ ہوا ہے۔
