بڑی تعداد میں پارٹی لیڈران نے کی شرکت، مہاراجہ کے دور اقتدار کو یاد کیا گیا
لازوال ڈیسک
جموں؍؍ڈیموکریٹک پروگریسو آزاد پارٹی نے ہفتہ کو مہاراجہ ہری سنگھ کی 128 ویں یوم پیدائش منائی اور جموں و کشمیر میں امن اور ترقی کے لیے ان کی خدمات پرانہیں خراج عقیدت پیش کیا۔ وہیںپارٹی کی سینئر قیادت نے جموں میں ہری سنگھ کے مجسمے پر کیک کاٹا اور جموں و کشمیر میں سماجی اقتصادی ترقی میں ان کی شاندار شراکت کا جائزہ لیا۔اس موقع پرپارٹی کے جنرل سکریٹری آر ایس چِب نے کہاکہ ہم انہیں نہیں بھول سکتے کہ انہوں نے جموں و کشمیر کی آنے والی نسلوں کے لیے کیا کیا۔ وہ ایک بصیرت والے حکمران تھے اور اگر جموں وکشمیرمیں ترقی اور پیشرفت نظر آتی ہے تو یہ سب ان کا تعاون تھا۔انہوں نے کہا کہ ہندوستان سے الحاق بھی دور اندیشی ہے اور وہ جانتے تھے کہ یونین آف انڈیا کے ساتھ جموں وکشمیرمحفوظ ہے اور موجودہ صورتحال میں یہ بالکل درست ثابت ہو رہا ہے۔وہیں صوبائی صدر جموں جگل کشور شرما نے کہا کہ ہری سنگھ ایک ایسے حکمران تھے جو عام لوگوں کا درد اپنے دل میں رکھتے تھے اور عام اور غریب لوگوں کو فائدہ پہنچانے کے لیے پالیسیاں اور قوانین وضع کرتے تھے۔ انہوں نے سڑکیں، کالج اور ہسپتال بنائے جہاں لوگ مفت علاج اور تعلیم حاصل کرتے رہے۔ انہوں نے مزیدکہاکہ جموں و کشمیر کی تاریخ میں کوئی بھی حکمران اتنا ہمدرد اور مہربان نہیں رہاجیساکہ مہاراجہ ہری سنگھ تھے۔ کشور نے کہا کہ انہوں نے ڈی پی اے پی کے چیئرمین غلام نبی آزاد کی جانب سے حکمران کو خراج عقیدت پیش کیا۔ انہوں نے کہا کہ یہاں تک کہ جموں و کشمیر میں خواتین کو بااختیار بنانے کا تصور بھی ان کی کوششوں کی وجہ سے ہے جب سے انہوں نے خواتین بچوں کو مفت تعلیم کو یقینی بنایا۔ اس موقع پر لوگوں کی بڑی تعداد نے شرکت کی اور ان کی خدمات کو یاد کیا۔
