بھلیسہ بسران سے تعلق رکھنے والے دو نوجوانوں کی موقع پر ہوئی موت
اکرم ملک
بھلیسہ // ڈوڈہ ٹھاٹھری قومی شاہراہ کے پریم نگر مقام پر موٹر سائیکل اور ٹمپو گاڑی کے درمیان زور دار ٹکر ہوئی جس کے نتیجہ میں بھلیسہ بسران گاو¿ں سے تعلق رکھنے والے دو نوجوانوں کی موقع پر ہی موت ہوئی۔ تفصیلات کے مطابق منگل کے روز قومی شاہراہ ڈوڈہ ٹھاٹھری کے پریم نگر مقام پر تیز رفتار ٹمپو گاڑی زیرِ نمبر 4895 JK17 اور موٹر سائیکل زیرِ نمبر4865 PB09Qکے درمیان ٹکر سے جہاں موٹر سائیکل گاڑی کو شدید نقصان پہنچا وہیں موٹرسائیکل پر سوار دو نوجوانوں کی موقع پر ہی موت ہوئی ہے۔حادثہ کی اطلاع ملتے ہی مقامی لوگ و محکمہ پولیس کا عملہ جائے واردات پر پہنچے اور دونوں نوجوانوں کو سب ضلع اسپتال ٹھاٹھری منتقل کیا گیا جہاں پر دونوں نوجوانوں کو ڈاکٹروں نے مردہ قرار دیا۔مرنے والے نوجوانوں کی شناخت عرفان حسین ولد مشتاق احمد ساکنہ بسران احسان حسین ولد عبدل لطیف ساکنہ بسران کے طور پر ہوئی ہے۔
