وارڈ نمبر 61 میں 6 کروڑ روپے کی تخمینہ لاگت سے نالہ کے تعمیراتی کام کا آغاز کیا
لازوال ڈیسک
جموں؍؍سابق ممبر پارلیمنٹ (راجیہ سبھا) اور سابق ریاستی صدر (بی جے پی) جموں و کشمیر شمشیر سنگھ منہاس نے اپنے ایک بیان میںکہا کہ جموں میونسپل کارپوریشن (جے ایم سی) کو جموں شہر میں نکاسی آب کے موثر نظام کے لئے نئے طریقہ کار اور ٹیکنالوجی کو تیار کرنا چاہئے۔ یہ بات منہاس نے وارڈ نمبر 61 میں کونسلر مہندر بھگت کے ساتھ 6 کروڑ روپے کی تخمینہ لاگت سے نالہ کے تعمیراتی کام کا آغاز کرتے ہوئے کہی۔منہاس نے کہا کہ نکاسی آب کے نظام میں نجی یا سرکاری املاک کے اندر تمام پائپنگ شامل ہیں جو سیوریج، بارش کے پانی اور دیگر مائع فضلہ کو ٹھکانے کے مقام تک پہنچاتے ہیں۔ انہوں نے کہا کہ نکاسی آب کے نظام کا بنیادی مقصد صحت مند حالات کو برقرار رکھنے کے لیے فضلہ کو منظم طریقے سے جمع کرنا اور ہٹانا ہونا چاہیے۔منہاس نے کہا کہ یہ پروجیکٹ قدرتی نکاسی آب کے نظام کو مضبوط اور بہتر بنائے گا۔انہوں نے مزیدکہاکہ یہ غیر ٹریٹمنٹ سیوریج کے بہنے کی وجہ سے زیر زمین پانی کے معیار کی خرابی کو بھی روکے گا۔ اس لیے یہ منصوبہ وارڈ نمبر 61 کے قریبی رہائشیوں کی زندگیوں پر مثبت اثر ڈالے گا۔
