بی جے پی نے پارٹی ہیڈکوارٹر میں پرجا پریشد کے ویٹرانز کا اجلاس منعقد کیا
لازوال ڈیسک
جموں؍؍بھارتیہ جنتا پارٹی کے ناناجی دیشمکھ لائبریری اور دستاویزی شعبہ نے اپنے انچارج پروفیسر کلبھوشن موہترا کی قیادت میں پرجا پریشد ایجی ٹیشن کے تجربہ کار لیڈروں اور کارکنوں کی پارٹی ہیڈ کوارٹر، تریکوٹہ نگر، جموں میں ایک میٹنگ کا اہتمام کیا۔اس موقع پر بی جے پی کے جنرل سکریٹری (تنظیم) اشوک کول نے کہا کہ آج بی جے پی نے 300 سیٹیں جیتنے کا اعزاز حاصل کیا ہے اور یہ بھارتیہ جن سنگھ اور پرجا پریشدکے دنوں سے کارکنوں کی محنت کا نتیجہ ہے۔ انہوں نے کہاکہ ویٹرانز نے 1953 میں جو پودا بویا تھا، وہ ایک بڑا برگد کا درخت بن گیا ہے اور اس کا سہرا پرعزم قوم پرست لوگوں کو جاتا ہے، جو زندگی کی آسائشوں کو چھوڑ کر تاریخی ایک ودھان، ایک نشان، ایک پردھان تحریک میں کود پڑے۔
اشوک کول نے کہاکہ جموں و کشمیر میں ایسے خاندانوں کی بڑی تعداد ہے جن کے بزرگوں نے خود کو قوم کے لیے وقف کر دیا تھا اور یہاں تک کہ قومی ترنگے اور آئین اور وزیر اعظم کے عہدے جیسے الگ الگ نشانوں کے لیے اپنی جانیں بھی قربان کر دی تھیں۔انہوں نیمزید کہا کہ ہمارے قدآور لیڈر ڈاکٹر شیاما پرساد مکھرجی نے اس سابقہ ریاست میں قوم کی خاطر اپنی جان قربان کی۔اشوک کول نے ان ویٹرانز اپیل کی کہ وہ آئندہ لوک سبھا انتخابات میں انتخابی مہم کی سرگرمیوں کے بامعنی انتظام کے لیے اپنے تجربے کا اشتراک کریں تاکہ بی جے پی پی ایم نریندر مودی کی قیادت میں مسلسل تیسری مدت کے لیے حکومت بنائے ۔
