ہم جلد ہی اے ایس آئی کے ساتھ اس تاریخی مسجد کی بحالی کی تجویز اٹھائیں گے: درخشاں
لازوال ڈیسک
سرینگر؍؍جموں و کشمیر وقف بورڈ کی چیئرپرسن ڈاکٹر سید درخشاں اندرابی نے آج پرانے شہر سری نگر میں واقع تاریخی پتھر مسجد کا دورہ کیا جو وقف بورڈ کی ملکیت ہے اور ایک محفوظ تاریخی یادگار ہونے کی وجہ سے آرکیالوجیکل سروے آف انڈیا اسکی دیکھ بھال کر رہا ہے۔ اندرابی بورڈ کی پہلی سربراہ بن گئی جنہوں نے وہاں کی چیزوں کا جائزہ لینے کے لیے سائٹ کا دورہ کیا۔ ان کی آمد پر مقامی آبادی نے ان کا پرتپاک استقبال کیا۔ بعد میں انہوں نے مقامی سوسائٹی کے نمائندوں کے ساتھ مسجد میں نماز ادا کرنے والوں کے لیے سہولیات اور بحالی کی بنیادی ضروریات کے بارے میں بھی بات چیت کی تاکہ یہ تاریخی مقام محفوظ رہے۔ ڈاکٹر اندرابی نے وقف بورڈ کے حکام کو عید کے تہوار سے قبل نماز کی جگہ کی نئی خوبصورت چٹائی کا انتظام کرنے کے احکامات جاری کئے۔انہوں نے کہاکہ ہم جلد ہی اے ایس آئیکے ساتھ اس تاریخی مسجد کی بحالی کی تجویز اٹھائیں گے۔انہوں نے کہاکہ یہ یادگار اب بھی ایک زندہ عبادت گاہ ہے اور میں اس محفوظ جگہ کی دیکھ بھال کرنے اور اسے صاف ستھرا رکھنے کے لیے مقامی آبادی کو مبارکباد پیش کرتی ہوں۔ ڈاکٹر اندرابی نے کہاکہ مجھے امید ہے کہ اے ایس آئی کی طرف سے سائٹ کی بحالی کی اجازت ملے گی کیونکہ ہم ان کے ساتھ تجویز اٹھانے جا رہے ہیں۔اس دوران ڈاکٹر اندرابی کے ساتھ وقف بورڈ کے افسران اور متعلقہ سرکاری محکموں کے نمائندے بھی موجود تھے۔
