یواین آئی
جموں؍؍سیکورٹی فورسز نے جموں وکشمیر کے ضلع پونچھ میں لائن آف کنٹرول کے نزدیک مینڈھر سیکٹر میں مشکوک نقل و حمل دیکھنے کے بعد تلاشی آپریشن شروع کر دیا۔معلوم ہوا ہے کہ سیکورٹی فورسز نے ایک درجن کے قریب علاقوں کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔اطلاعات کے مطابق جمعرات کی صبح سیکورٹی فورسز نے مصدقہ اطلاع ملنے کے بعد مینڈھر سیکٹر میں ایک درجن کے قریب علاقوں کو محاصرے میں لے کر تلاشی آپریشن شروع کیا۔ذرائع نے بتایا کہ مینڈھر سیکٹر میں مشتبہ افرادکی نقل و حمل کے بعد سیکورٹی فورسز نے رہائشی علاقوں کے ساتھ ساتھ کئی جنگلات کو بھی محاصرے میں لے لیا ہے۔ذرائع نے بتایا کہ علاقے میں تلاشی آپریشن کو وسیع تر اور سنگین تر کرنے کے لئے مزید سیکورٹی فورسز کو روانہ کیا گیا ہے۔یہ رپورٹ فائل کرنے تک علاقے میں تلاشی آپریشن ہنوز جاری تھا۔اس سلسلے میں مزید تفصیلات کا انتظارہے۔
