سریتا
بیکانیر، راجستھان
اکثر یہ پیشین گوئی کی جاتی ہے کہ اگر مستقبل میں عالمی جنگ ہوئی تو وہ پانی کے مسئلے پر لڑی جائے گی۔ آج کے دور میں پانی کی کمی ایک بڑا بحران بن چکا ہے۔ اس بحران کے مضر اثرات بھی بدتر ہو رہے ہیں ۔ پانی کی کمی نہ صرف انسانی زندگی بلکہ درختوں، پودوں، جانوروں اور پرندوں کو بھی نقصان پہنچاتی ہے۔ رفتہ رفتہ یہ بحران سنگین ہوتا جا رہا ہے۔ ہمیں اس مسئلے کو سنجیدگی سے لینے کی ضرورت ہے۔ راجستھان ملک کی ایسی ریاست ہے جہاں دیہی علاقوں کو سب سے زیادہ پانی کے بحران کا سامنا کرنا پڑتا ہے۔ ریاست کے بیکانیر ضلع میں واقع لنکرنسر بلاک کا بنجھر واڑی گاؤں بھی اس کی ایک مثال ہے، جہاں پانی کی کمی سے لوگوں کی زندگی متاثر ہو رہی ہے۔ اس کا سب سے زیادہ خمیازہ خواتین کو اٹھانا پڑتا ہے جو اپنے روزانہ کے آدھے سے زیادہ وقت پانی جمع کرنے میں صرف کرتی ہیں۔بنجر واڑی گاؤں کی تاریخ 600 سال پرانی ہے۔ خیال کیا جاتا ہے کہ اسے راجپوتوں نے آباد کیا تھا۔ اس گاؤں میں بنجھا برادری کی کثیر تعداد کی وجہ سے اس کا نام بنجھر واڑی گاؤں رکھا گیا ہے۔
گاؤں میں تقریباً 400 گھر ہیں جن میں بنجھا برادری کے علاوہ 40 گھر عام برادری کے ہیں اور تقریباً 50 گھر راجپوت برادری کے ہیں۔ گاؤں کی زیادہ تر آبادی سلائی اور مویشی پالنے کے علاوہ تھوڑی بہت کھیتی باڑی بھی کرتی ہے۔ شروع سے ہی بنجر واڑی گاؤں میں پانی کی بہت کمی تھی، لیکن آج یہ سب سے بڑا مسئلہ بن گیا ہے۔ اس سے نمٹنے کے لیے گاؤں کے لوگوں نے ایک جوہڑ (باؤلی) بنایا ہے۔ سال 2004-05 میں یہاں تقریباً 400 بیریاں تھیں جو اس وقت کم ہو کر 100 سے 150 رہ گئی ہیں۔ جہاں سے لوگ پانی حاصل کرتے ہیں۔ گاؤں والوں کا کہنا ہے کہ ایک بیری سے صرف 1000 لیٹر پانی نکالا جا سکتا ہے۔ جہاں سے گاؤں کی خواتین اور نوعمر لڑکیوں کو پانی کے برتن سروں پر رکھ کر اپنے گھروں کو جانا پڑتا ہے۔ موسم گرما میں پانی کے بغیر عوام کی زندگی کتنی مشکل ہو جاتی ہے اور خواتین کو پانی کا بندوبست کرنے کے لیے کتنی مشکلات سے گزرنا پڑتا ہے،شہروں میں رہنے والوں کے لئے اس کا تصور بھی مشکل ہے۔
اس سلسلے میں گاؤں کے رہنے والے 33 سالہ منی رام کا کہنا ہے کہ گاؤں میں پانی سب سے بڑا مسئلہ ہے۔ اس کے لیے گاؤں کے لوگوں نے کافی جدوجہد کی ہے۔ وہ پانی کے انتظام کے لیے گاؤں کے سرپنچ، ایس ڈی ایم اور تحصیلدار کے پاس اپنا مسئلہ لے کر گئے ہیں۔ یہاں تک کہ گاؤں والوں نے ضلع مجسٹریٹ اور وزیر اعلیٰ کے دفتر تک آواز اٹھائی ہے۔ کئی دھرنا مظاہرے بھی ہوئے۔ 2014 میں، ایک مقامی این جی او ’’آزاد یووا سنگٹھن‘‘نے اس علاقے میں بہت تعاون کیا ہے۔ گاؤں والوں کی مسلسل جدوجہد سے حالات میں کچھ بہتری ضرور آئی ہے لیکن مسئلہ ابھی بھی مکمل طور پر ختم نہیں ہوا ہے۔ منی رام کا کہنا ہے کہ اکثر کئی جگہوں پر پانی کی بیریوں کو تالے لگائے جاتے ہیں، جس سے ذات پات کا نہیں بلکہ پانی کا مسئلہ ظاہر ہوتا ہے۔ اگرچہ پہلے یہ ذات پرستی کی نشاندہی کرتا تھا، کیونکہ پہلے مختلف ذاتوں کے مختلف بیر تھے، جس کی وجہ سے پانی کی بیری پر تالا لگا ہوا تھا۔لیکن اب مسئلہ پانی کے تحفظ کا ہے۔اس وقت پانی لوگوں کے گھروں تک پہنچتا ہے جسے مقامی نہر کے ذریعے سپلائی کیا جاتا ہے۔
لیکن پھر بھی آپ خواتین کو سر پر گھڑے اٹھائے ہوئے دیکھ سکتے ہیں کیونکہ پانی مناسب مقدار میں لوگوں تک نہیں پہنچ پاتا ہے۔ گاؤں کے لوگوں کا کہنا ہے کہ گاؤں میں پانی ذخیرہ کرنے کی کمی ہے۔ یہاں ایسا کوئی نظام نہیں ہے کہ اگر 1 یا 2 ماہ پانی نہ ہو تو لوگ زندہ رہ سکتے ہیں، انہیں اس سے کوئی مسئلہ پیش نہ آئے۔ اس سلسلے میں گاؤں کی ایک خاتون یشودا کا کہنا ہے کہ یہاں سب سے بڑا مسئلہ گرمیوں میں ہوتا ہے۔بیریوں سے روزانہ 10 گھڑے پانی نکالنا پڑتا ہے جس میں سارا دن گزر جاتا ہے۔ گاؤں میں پائپ لائن لگنے کے بعد بھی اس میں 10 یا 20 دن میں ایک بار پانی آتا ہے۔ جب آتا ہے تو بھی پورے گاؤں میں یکساں طور پر نہیں آتا۔
سماجی کارکن اور کالم نگار دلیپ بداوت، جو پانی کے بحران کے مسئلے کو حل کرنے کے لیے مسلسل کوششیں کر رہے ہیں، کہتے ہیں کہ راجستھان کے مختلف علاقوں میں کمیونٹی کی جانب سے مختلف قسم کے پانی کے روایتی آبی ذرائع بنائے گئے ہیں۔ اس علاقے کی سطحی اور ارضیاتی ساخت اور بارش کی مقدار کے مطابق پانی کے کس قسم کے ذرائع پیدا کیے جا سکتے ہیں، لوگوں کو یہ علم اس زمانے میں بھی تھا جب آج کی طرح تعلیم اور ٹیکنالوجی نے ترقی نہیں کی تھی۔ بارش کے قطروں کو سطح پر ذخیرہ کرنے کے ساتھ ساتھ زمین میں پینے کا پانی کہاں سے مل سکتا ہے اور اسے کیسے حاصل کیا جا سکتا ہے؟ یہ معلوم کرنا کئی نسلوں کا تجربہ رہا ہوگا ۔ اس کے علاوہ سطحی پانی ختم ہونے کے بعد زمین کے اندر فطرت کی طرف سے ذخیرہ کیے گئے پانی کو تلاش کرنا اور استعمال کرزندگی کو برقرار رکھنے کے لیے ایک شاندار تجربہ رہا ہوگا۔ لیکن آج کی نسل اس ٹیکنالوجی کو بھول چکی ہے جس کا نتیجہ پانی کے بحران کی صورت میں سامنے آرہا ہے۔
تاہم، بنجر واڑی گاؤں کے تقریباً تمام گھروں کی خواتین اپنے سروں پر پانی اٹھانے کا کام کرتی ہیں۔ خواتین برتنوں اور بالٹیوں میں پانی لاتی ہیں، مرد ٹریکٹروں اور اونٹوں کی گاڑیوں سے بھرے گیلن میں پانی لاتے ہیں۔ گاؤں کے لوگوں کو روزانہ پانی لانے کے لیے کافی مشقت کرنی پڑتی ہے۔ پانی کے اس مسئلے نے نوعمر لڑکیوں کی تعلیم کو بہت متاثر کیا ہے۔ اکثر انہیں گھر کی خواتین کے ساتھ پانی جمع کرنے کے لیے اسکول چھوڑنا پڑتا ہے۔ کیا ہم سوچ سکتے ہیں کہ جس گاؤں کی لڑکیاں اسکول کی کتابوں کے بجائے سر پر پانی کے برتن اٹھانے کی جدوجہد کر رہی ہوں، وہ گاؤں ترقی کر سکے گا؟ (چرخہ فیچر)
