کثیر دائروں والی سیکورٹی کا بندوبست، سری نگر میں ہائی الرٹ
یواین آئی
سرینگر؍؍وزیر اعظم نریندر مودی 7مارچ کو جموں وکشمیر کے دورے پر آرہے ہیں جس کے پیش نظر وادی میں کثیر دائروں والی سیکورٹی کا بندوبست کیا گیا ہے۔ ذرائع نے بتایا ’وزیر اعظم مودی کے دورہ کشمیر کے لئے سیکورٹی کے مثالی انتظامات کئے گئے ہیں، سری نگر میں جگہ جگہ اضافی نفری تعینات کردی گئی ہے‘۔ایک سینئر عہدیدار نے بتایا کہ وزیر اعظم کے دورے کے پیش نظر تمام سیکورٹی ایجنسیاں ہائی الرٹ پر ہیں۔ انہوں نے مزید بتایا کہ کشمیر میں ناکوں کا جال بچھایا گیا ہے۔
انہوں نے مزید کہا کہ سری نگر شہر میں مختلف سڑکوں بالخصوص ائر پورٹ روڈ پر موبائیل چیک پوائنٹس قائم کئے گئے ہیں جہاں پولیس اور سینٹرل ریزرو پولیس فورس(سی آر پی ایف) کے اہلکار تعینات کئے گئے ہیں۔ان کے مطابق سری نگر کے حساس علاقوں میں اضافی نفری تعینات کی گئی ہیں اور کسی بھی گاڑی کو بغیر تلاشی کے شہر کے حدود میں جانے کی اجازت نہیں دی جارہی ہیں۔
ذرائع نے بتایا کہ کشمیرصوبے میں چپے چپے پر سیکورٹی فورسز کی تعیناتی عمل میں لائی گئی ہے جبکہ مشکوک نظر آنے والے افراد کو بغیر چیکنگ کے آگے جانے کی اجازت نہیں دی جارہی ہیں۔ذرائع کا کہنا ہے کہ وزیرا عظم نریندر مودی کے سری نگر دورے پر سبھی کی نظریں ٹکی ہوئی ہیں کیونکہ بھاجپا کے سینئر لیڈروں کا کہنا ہے کہ دورہ غیر معمولی اہمیت کا حامل ہے۔
بی جے پی کے ایک سینئر لیڈر نے یو این آئی اردو کو بتایا کہ نریندر مودی سات مارچ کو سری نگر کے بخشی اسٹیڈیم میں ایک ریلی سے خطاب کریں گے۔انہوں نے مزید بتایا کہ وزیرا عظم کے سری نگر دورے کو حتمی شکل دی گئی ہے اور اس حوالے سے سیکورٹی کے بھی پختہ انتظامات کئے جارہے ہیں۔دریں اثنا وزیر اعظم نریندر مودی کے دورے کے پیش نظر پاکستان کے ساتھ لگنے والی سرحد پر فوج کی چوکسی بڑھائی گئی ہے تاکہ ملک دشمن عناصر کے منصوبوں کو ناکام بنایا جاسکے۔ذرائع نے بتایا کہ حد متارکہ پر فوج کو مستعد رہنے کے احکامات صادر کئے گئے ہیں۔
ذرائع کے مطابق سرحد پر مشکوک سرگرمیوں پر کڑی نظر گزر رکھی جارہی ہے اور ملک دشمن عناصر کی طرف سے کسی بھی ناموافق کوشش کو ناکام بنانے کے لئے فوج، سی آر پی ایف اور پولیس کے ساتھ مشترکہ گشت بھی جاری ہے۔
دفاعی ذرائع نے بتایاکہ لائن آف کنٹرول میں اگلی چوکیوں پر تعینات فوجی اہلکار دن رات نظر گزر رکھے ہوئے ہیں تاکہ سرحد پار سے کوئی بھی ایل او سی کو پار نہ کر سکے۔انہوں نے بتایا کہ ہم انتہائی مستعد ہیں کیونکہ ملی ٹینٹوں نے دراندازی کرکے کشمیر میں داخل ہونے کے ارادارے ترک نہیں کئے ہیں۔انہوں نے مزید بتایا کہ وادی میں قیام امن کو یقینی بنانے کے لئے کشمیر کے350 کلومیٹر سرحد پر چوکسی بڑھائی گئی ہیں۔دفاعی ذرائع نے مزید بتایاکہ سرحدوں پر تعینات افواج کو چوبیس گھنٹے متحرک رہنے کے احکامات صادر کئے گئے ہیں تاکہ ملک دشمن عناصر کے منصوبوں کو خاک میں ملایا جاسکے۔
