مختلف ادبی، ثقافتی اور سماجی تنظیموں کی مبارکباد
شافیہ گلفام
سرینگر؍؍گزشتہ دنوں جنوبی کشمیر کے سیر ہمدان اننت ناگ میں ایک پروقار ادبی تقریب منعقد ہوئی جس میں وادی کشمیر کے کئی معروف ادیبوں، قلم کاروں اور شاعروں نے شرکت کی۔ اس ادبی تقریب میں گلستان نیوز چینل کی جانب سے وادی کے معروف شاعر، نعت خواں اور نعت گو محمد نعیم خان کو ان کے ادب کے تئیں ان کی بہترین خدمات کو مدنظر رکھ کر انہیں اعزاز سے نوازا گیا اور ان کی شال پوشی کی گئی۔یہ اعزاز انہیں تقریب میں کئی معروف شخصیات کی موجودگی میں معروف قلم کار اور شاعر مجید مسرور نے عطا کیا۔ادھر وادی کی کئی ادبی، ثقافتی اور سماجی تنظیموں نے محمد نعیم خان کو گلستان نیوز چینل کی جانب سے کی گئی عزت افزائی کے لئے انہیں مبارکباد پیش کی۔ اس موقع پر محمد نعیم خان نے گلستان نیوز چینل کا شکریہ ادا کرتے ہوئے یہ امید جتائی کہ آنے والے وقت میں بھی گلستان نیوز چینل کی طرح دیگر ثقافتی ادارے وادی کے ادیبوں،قلم کاروں اور شاعروں کے ساتھ ساتھ دیگر فنکاروں کو بھی اس طرح کے اعزازات سے نوازیں گے۔
