چنڈی گڑھ، 6 اکتوبر (یو این آئی) عام آدمی پارٹی (اے اے پی) کے سینئر لیڈر اور راجیہ سبھا ممبر پارلیمنٹ راگھو چڈھا نے جمعرات کو بی جے پی کی قیادت والی قومی جمہوری اتحاد حکومت پر دودھ کی بڑھتی ہوئی قیمتوں کو روکنے میں ناکامی پر ہدف تنقید بناتے ہوئے کہا کہ مرکز اس مسئلہ کو حل کرنے میں ناکام ہے۔ برسوں پہلے اس کے بارے میں جاننے کے باوجود دودھ کی قیمتوں میں مزید اضافے کا امکان ہے کیونکہ دودھ کی قیمتوں اور چارے کی قیمتوں کے درمیان براہ راست تعلق ہے۔
مسٹر چڈھا نے کہاکہ "دودھ کی قیمتیں ایک بار پھر بڑھنے والی ہیں، چارے کی قیمتوں میں بے لگام اضافہ، لمپی وائرس کے پھیلاؤ کی وجہ سے کچھ سالوں سے کسان چارے کی بجائے دوسری فصلیں بونے کو ترجیح دے رہے ہیں۔ اگست میں چارے کی قیمتیں اب 25.54 فیصد کی نو سال کی بلند ترین سطح پر پہنچ گئی ہیں۔ صرف گجرات، جو ملک میں دودھ کا سب سے بڑا پیدا کرنے والا صوبہ ہے، گزشتہ دو سالوں میں چارے کی فصلوں کے زیر رقبہ میں 1.36 لاکھ ہیکٹر کی کمی واقع ہوئی ہے۔ انہوں نے کہا کہ حکومت نے دو سال پہلے چارے کے بحران اور کاشتکار خاندانوں پر اس کے اثرات کو دیکھا تھا۔ اس لیے خاص طور پر چارے کے لیے 100 فارمر پروڈیوسر آرگنائزیشنز (ایف پی او) قائم کرنے کی تجویز مرکزی وزارت ماہی پروری، حیوانات اور دودھ کی پیداوار نے ستمبر 2020 میں تیار کی تھی۔
ستم ظریفی یہ ہے کہ بحران کے سامنے آنے کے باوجود اب تک ایک بھی ایف پی او رجسٹر نہیں ہوا ہے۔ حکومت کو ممکنہ بحران کا برسوں پہلے علم تھا لیکن کچھ نہیں کیا۔ صرف ایک سال میں چارے کی قیمت اور طلب دونوں تین گنا بڑھ گئے ہیں۔ مثال کے طور پر اکیلے راجستھان اور مدھیہ پردیش میں چارہ (بھوسہ) کی قیمتیں 400-600 روپے فی کوئنٹل سے بڑھ کر 1100-1700 روپے فی کوئنٹل ہو گئیں۔ لمپی وائرس بے قابو ہو رہا ہے اور چارے کی قیمتیں بلا روک ٹوک بڑھ رہی ہیں، لیکن حکومت نے ان مسائل سے نمٹنے کے لیے کچھ نہیں کیا۔ جس کی وجہ سے کسانوں کو مزید مشکلات کا سامنا ہے۔
