بی جے پی کاچناوی منشور جاری کریں گے،چناوی جلسوں سے خطاب کریں گے
جان محمد
جموں//بھارتیہ جنتا پارٹی (بی جے پی) جموں و کشمیر اسمبلی انتخابات کی مہم کا باضابطہ آغاز آج کرے گی، جب مرکزی وزیر داخلہ امت شاہ جموں میں پارٹی کا تاریخی انتخابی منشور جاری کریں گے۔ یہ منشور، جسے ’سَنکَلپ پتر‘ کے نام سے جانا جائے گا، ریاست کی سیاسی فضا میں ایک نئی لہر پیدا کرنے کی توقع ہے۔جمعہ کو ہونے والے اس اہم اعلان کے بعد، ہفتہ کے روز امت شاہ جموں کے شمالی حلقے میں ایک بڑے عوامی جلسے سے خطاب کریں گے، جس سے نہ صرف پارٹی کے حامیوں میں جوش بڑھے گا بلکہ آنے والے انتخابات کی سمت بھی واضح ہوگی۔
بی جے پی کے سینئر رہنما اور سابق نائب وزیر اعلیٰ، ڈاکٹر نرمل سنگھ، جو پارٹی کے منشور کمیٹی کے چیئرمین بھی ہیں، نے بتایا کہ مرکزی وزیر داخلہ امت شاہ’سَنکَلپ پتر‘(قرارداد نامہ) جاری کریں گے، جو عوام کی آراء لینے کے بعد تیار کیا گیا ہے۔ڈاکٹر سنگھ نے اپوزیشن پر تنقید کرتے ہوئے کہا، ’’بی جے پی کا منشور قابل حصول وعدوں پر مبنی ہوگا اور ہر طبقے کا خیال رکھے گا۔‘‘۔اُنہوں نے کہاکہ بھاجپا وہی کہتی ہے جوکرتی ہے ،وہ اپوزیشن جماعتوں کی طرح گمراہ کن نعرے بلندنہیں کرتی بلکہ عوام کے جذبات واحساسات کی حقیقی ترجمانی کرتی ہے اورچناوی منشورعوامی آرا کے بعد تیارکیاگیاہے۔
https://jkbjp.in/
جموں کے دورے کے دوران، امت شاہ سینئر قیادت سے ملاقات کریں گے اور انتخابی مہم کا جائزہ لیں گے۔مزید برآں، شاہ ہفتہ کے روز جموں میں ایک عوامی جلسے سے خطاب کریں گے تاکہ جموں و کشمیر اسمبلی انتخابات کے لیے بی جے پی کی مہم کو تقویت دی جا سکے۔جلسے سے قبل، کوئلہ اور کان کنی کے مرکزی وزیر اور جے کے اسمبلی انتخابات کے انچارج، جی کشن ریڈی نے جلسے کے مقام کا معائنہ کیا اور تیاریاں کا جائزہ لیا۔ریڈی نے کہا، ’’ہم اس بات کو یقینی بنا رہے ہیں کہ ہر تفصیل کا باریک بینی سے خیال رکھا جائے۔ امت شاہ کا دورہ ہماری مہم کی حکمت عملی کا ایک اہم حصہ ہے، اور ہمیں یقین ہے کہ اس سے ہمارے حامیوں میں نیا جوش پیدا ہوگا۔‘‘بی جے پی ایک مضبوط انتخابی مہم کے لیے تیار ہو رہی ہے، اور وزیر اعظم نریندر مودی سمیت دیگر سینئر رہنما جموں وکشمیر بھر میں جلسوں سے خطاب کریں گے۔
