کانفرنس میں ملک کو مضبوط اور محفوظ بنانے پر توجہ دی جائے گی
لازوال ڈیسک
لکھنو؍؍لکھنو میں پہلی بار فوج کی طرف سے جوائنٹ کمانڈرز کانفرنس کے انعقاد کے لیے یہاں سنٹرل کمانڈ ہیڈکوارٹر میں تیاریاں شروع ہو گئی ہیں۔4 اور 5 ستمبر کو ہونے والی 2 روزہ کانفرنس کے لیے سیکیورٹی ڈرل بھی شروع ہو گئی ہے۔ کانفرنس سے قبل پورے کنٹونمنٹ ایریا میں سیکورٹی کے انتظامات کو مضبوط بنانے کے لیے کام شروع کر دیا گیا ہے، اضافی سی سی ٹی وی کیمرے نصب کیے جا رہے ہیں۔
دو روز تک ہائی الرٹ رہے گا۔ ذرائع نے پیر کو یہاں بتایا کہ کنٹونمنٹ ایریا کے علاوہ اس کانفرنس کی وجہ سے ریلوے سٹیشنوں، ہوائی اڈوں، بس سٹینڈوں پر بھی سکیورٹی کو بڑھایا جائے گا۔کانفرنس میں ملک کو مضبوط اور محفوظ بنانے پر توجہ دی جائے گی۔ کانفرنس میں وزیر دفاع، چیف آف ڈیفنس اسٹاف اور آرمی، نیوی اور ایئر فورس کے سربراہان شرکت کریں گے۔ تھیٹر کمانڈ اور آرمی کو اپ گریڈ کرنے پر بات ہوگی۔چیف آف ڈیفنس اسٹاف انیل چوہان 4 ستمبر کو خطاب کریں گے جب کہ دوسرے دن وزیر دفاع راج ناتھ سنگھ کانفرنس سے خطاب کریں گے۔
اس کے علاوہ فوج، بحریہ اور فضائیہ کے اعلیٰ کمانڈرز فوج کی مضبوطی، آلات کی ضرورت وغیرہ پر بیانات دیں گے۔دو روزہ کانفرنس کا موضوع ’’مضبوط اور محفوظ ہندوستان: مسلح افواج کی تبدیلی‘‘ رکھا گیا ہے۔ جس کے تحت فوج سے متعلق امور پر تبادلہ خیال کیا جائے گا۔اس کے علاوہ میک ان انڈیا کے تحت دفاعی سازوسامان کی تیاری جیسے مسائل پر بات چیت ہوگی اور مسلح افواج کے ڈائریکٹوریٹ کے ذریعہ پریزنٹیشن دیے جائیں گے۔کانفرنس میں تھیٹر کمانڈ بنانے کے حوالے سے بھی بات چیت ہوگی۔تھیٹر کمانڈ کا استعمال جنگ کے دوران کیا جاتا ہے جب بات تینوں فوجوں کے درمیان ہم آٓہنگی کی ہو۔ یہ تینوں افواج کے درمیان ہم آہنگی پیدا کرنے میں اہم کردار ادا کرے گا۔
