فوج یاترا کے احسن انعقاد کے لئے پوری طرح سے تیار

پوتر گھپا تک راستوں کی نگرانی کے لئے کواڈ کوپٹر، نائٹ وڑن آلات کا استعمال:کمانڈر امن دیپ سنگھ مالہی
یواین آئی

سری نگر؍؍فوج کا کہنا ہے کہ امسال شری امرناتھ جی یاترا کے پر امن اور ہموار انعقاد کے لئے سیکورٹی کے اضافی انتظامات عمل میں گئے ہیں اور کواڈ کوپٹرس کے علاوہ نائٹ وڑن آلات کو استعمال میں لایا گیا ہے تاکہ یاترا کے دونوں راستوں پر دن رات کی نگرانی کو یقینی بنایا جا سکے۔انہوں نے کہا کہ فوج، پولیس اور دیگر سیکورٹی فورسز کو پورے راستے اور اندرونی علاقوں میں تعینات کیا گیا ہے اور فوج یاترا کے احسن انعقاد کے لئے پوری طرح سے تیار ہے۔فوج کی آر آر کے 1سیکٹر کمانڈر امن دیپ سنگھ مالہی نے ان باتوں کا اظہار ہفتے کو پہلگام بیس کیمپ پر ایک پریس کانفرنس سے خطاب کے دوران کیا۔انہوں نے کہا: ‘ہم سب سے پہلے یاتریوں کا استقبال کرتے ہیں امسال پر امن اور ہموار یاترا کے انعقاد کے لئے سیکورٹی کے اضافی انتظامات کئے گئے ہیں’۔ان کا کہنا تھا: ‘پہلگام اور بالتل بیس کیمپوں سے پوتر گھپا تک جانے کے راستوں پر دن رات نگرانی کے لئے کواڈ کوپٹر اور نائٹ وڑن آلات کا استعمال کیا گیا ہے، فوج کے علاوہ پولیس اور دیگر سیکورٹی فورسز کو اونچی جگہوں پر تعینات کیا گیا ہے، اندرونی علاقوں میں بھی سیکورٹی فورسز کی ٹکڑیوں کو تعینات کیا گیا ہے’۔انہوں نے کہا: ‘فوجی جوانوں کو سمجھایا گیا ہے کہ وہ یاترا کے دوران مقامی لوگوں کی کم سے کم تکلیف کو یقینی بنائیں تاکہ ان کا کام کاج متاثر نہ ہوسکے’۔سیکٹر کمانڈر نے کہا کہ کسی بھی صورتحال سے نمٹنے کے لئے ‘مائونٹین اینڈ اولانچ ریسکیو ٹیموں کو بھی تعینات کر دیا گیا ہے۔انہوں نے کہا کہ امسال فوری اور موثر رسپانس ٹیمیں کسی بھی قدرتی آفت کی صورت میں تیز انخلا کو یقینی بنائیں گی۔ان کا کہنا تھا کہ امسال این ڈی ایم اے، این ڈی آر ایم اور ایس آر ڈی آر ایم کی ٹیموں نے مشترکہ مشقیں کیں تاکہ کسی بھی ہنگامی صورتحال میں بر وقت کارروائیوں کی انجام دہی کو یقینی بنایا جا سکے۔اس دوران فوج کی آر آر کے 3 سیکٹر کمانڈر اتل راجپوت نے کہا کہ پر امن یاترا کے انعقاد کو یقینی بنانے کے لئے کثیر سطحی سیکورٹی گرڈ کو لگا دیا گیا ہے۔انہوں نے کہا کہ پوتر گھپا کی طرف جانے والے راستوں کی چوبیس گھنٹے نگرانی کو یقینی بنانے کے لئے نگرانی کے آلات، نائٹ وڑن آلات، انٹی ڈرون ٹیمیوں اور بم سکاڈ کو تعینات کر دیا گیا ہے۔ان کا کہنا تھا کہ کسی بھی ہنگامی صورتحال میں یاتریوں کے انخلا کے لئے ایمرجنسی ہیلی پیڈس کو تیار رکھا گیا ہے۔فوجی افسر نے کہا کہ سال گذشتہ کی قدرتی آفت کو مد نظر رکھتے ہوئے امسال اس سلسلے میں موثر اقدام کئے گئے ہیں۔انہوں نے کہا: ‘ہم مقامی لوگوں کے ساتھ مسلسل رابطے میں ہیں جو یاترا کے کلیدی متعلقین ہیں یہ یاترا کشمیریت کا مظاہرہ کرنے کا ایک اور موقع ہے’۔ان کا کہنا تھا کہ فوج آخری یاتری کی محفوظ واپسی کو یقینی بنائے گی۔قابل ذکر ہے کہ 62 دنوں پر محیط شری امر ناتھ جی یاترا کا ہفتے کی صبح آغاز ہوا اور یہ یاترا 31 اگست کو اختتام پذیر ہوگی۔