تانیہ
چورسؤ،اتراکھنڈ
حال ہی میں جھارکھنڈ کی راجدھانی رانچی میں رہنے والے ایک باپ پریم گپتا نے جس طرح شادی کے نام پر دھوکہ دہی کا شکار ہونے والی اپنی بیٹی کو سسرال سے بڑی شان و شوکت سے واپس لایا ہے، وہ نہ صرف قابل تعریف ہے بلکہ یہ خواتین پر تشدد کے خلاف بھی ایک بلند آواز ہے۔ دراصل ہمارے معاشرے نے اخلاقیات اور روایت کے نام پر کئی لکشمن ریکھا بنائے ہیں۔ لیکن یہ صرف خواتین اور نوعمر لڑکیوں پر لاگو ہوتا ہے۔ ایک عورت سے توقع کی جاتی ہے کہ وہ ماں کے پیٹ سے لیکراپنی آخری سانس تک اس لائن پر چلتی رہے ۔لیکن دوسری جانب مردوں کے لیے روزانہ اس لکشمن ریکھا کو عبور کرنا عام ہے۔ خواہ وہ خواتین کے خلاف کسی بھی قسم کے مظالم کا ارتکاب کرے، معاشرہ آنکھیں بند کر لیتا ہے۔ سماج کو صرف عورتوں اور لڑکیوں کی فکر ہوتی ہے۔ اگر کوئی نوعمر لڑکی یا عورت ظلم کے خلاف آواز اٹھاتی ہے تو معاشرے کو تکلیف ہونے لگتی ہے۔ہندوستان نے 21ویں صدی میں بہت ترقی کی ہے۔ سائنس اور ٹیکنالوجی ہو یا معیشت، ہر میدان میں آج ہندوستان دنیا کے ترقی یافتہ ممالک سے آنکھ ملا کر بات کرتا ہے۔ لیکن ہندوستانی معاشرہ، خاص طور پر ہندوستان کا دیہی معاشرہ، نظریاتی طور پر اب بھی پسماندہ ہے ۔ اس دور میں بھی خواتین پر جسمانی اور ذہنی تشدد شہروں کی نسبت دیہات میں زیادہ عام ہے۔ پہاڑی ریاست اتراکھنڈ کے باگیشور ضلع کے گروڈ بلاک کا چورسؤ گاؤں اس کی ایک مثال ہے۔ جہاں خواتین کو سماجی تشدد کا سامنا کرنی پڑتی ہے۔وہ ہر قدم پر اخلاقیات اور روایت کے نام پر پابندیوں اور مظالم کا نشانہ بنتی ہے۔ لڑکیاں اور خواتین جب بھی گھر سے باہر نکلتی ہے تو اسے لوگوں کے طعنے سننے پڑتے ہیں۔ انہیں گھر کی چار دیواری کے اندر رہنے کا مشورہ دیا جاتا ہے۔ اسے اپنے شوہر کے تشدد کو برداشت کرنے پر مجبور کیا جاتاہے۔ تشدد کے خلاف آواز اٹھانے والی عورت کا ساتھ دینے کے بجائے معاشرہ اسے ہی برا بھلا کہتا ہے۔
چورسؤ گاؤں کی مجموعی آبادی 3584 افراد پر مشتمل ہے۔ جبکہ خواندگی کی شرح 75 فیصد کے لگ بھگ ہے۔ تاہم خواتین کی شرح خواندگی مردوں کے مقابلے بہت کم ہے۔ تعلیم کی اس کمی کی وجہ سے اس گاؤں کی خواتین اپنے حقوق سے آگاہ نہیں ہیں۔ جس کی وجہ سے وہ فیصلہ نہیں کر پاتی کہ کیا صحیح ہے اور کیا غلط ہے؟ وہ یہ بھی نہیں جانتی کہ اس کے ساتھ ہونے والے کسی بھی قسم کے تشدد کے خلاف کیسے بولنا ہے؟ گاؤں کی زیادہ تر خواتین کو گھر سے باہر نکلنے پر پابندی ہے۔ عورتیں گھر سے باہر کام کرنے کے لیے بھی نکلیں تو یہ اپنے آپ کو گھر کے اندر چھوڑنے کے مترادف ہے۔ اس حوالے سے گاؤں کی 18 سالہ لڑکی سمرن کا کہنا ہے کہ ہم جب بھی گھر سے باہر نکلتے ہیں تو ہمیں لوگوں کے طعنے اور لڑکوں کے گندے کمنٹس سننے پڑتے ہیں۔ ہمیں ہر روز ان چیزوں کا سامنا کرنا پڑتا ہے۔ جس کا براہ راست اثر ہماری صحت اور ذہنیت دونوں پر پڑتا ہے۔ جس کی وجہ سے پڑھائی میں بھی دل نہیں لگتا۔گاؤں کی ایک اور نوعمر ریتیکا کہتی ہیں کہ ہمیں اپنی زندگی میں بہت سارے سماجی تشدد کا شکار ہونا پڑتا ہے۔ ہم اپنے پسندیدہ لباس جیسے جینس، شرٹ ٹاپ پہن کر بھی باہر نہیں جا سکتے کیونکہ لوگ نہ صرف ہمیں غلط نظروں سے دیکھتے ہیں بلکہ ایسے تبصرے بھی کرتے ہیں جس سے ہمیں ذہنی طور پر تکلیف ہوتی ہے۔ ہم خود محسوس کرتے ہیں کہ پتہ نہیں ہم نے کیا کیا ہے؟ بولنے سے پہلے لوگ یہ بھی نہیں سوچتے کہ ایسی سوچ ہمیں کتنی تکلیف دیتی ہے۔ افسوسناک بات یہ ہے کہ گھر والے حمایت اور حوصلہ افزائی کے بجائے لڑکیوں پر الزام تراشی شروع کردیتے ہیں۔ یہ کسی بھی لڑکی کے لیے دوہری مصیبت ہے اور وہ ذہنی طور پر ٹوٹ جاتی ہے۔
وہیں 26 سالہ سنگیتا دیوی کا کہنا ہے کہ خواتین اپنے ہی خاندان سے لے کرباہری دنیا تک کسی نہ کسی طرح کے تشدد کا شکار ہو رہی ہے۔ اگر ہم اس کے خلاف آواز اٹھاتے ہیں تو معاشرہ ہمارا ساتھ دینے کے بجائے ہمارے ہی کردار پر سوال اٹھانے لگتا ہے۔ سارا الزام لڑکیوں اور عورتوں پر ڈال دیا جاتا ہے ۔ معاشرہ سب سے پہلے ہماری عزت نفس اور کردار پر انگلیاں اٹھاتا ہے۔ اخلاقیات اور روایت کا حوالہ دے کر لڑکیوں اور خواتین کو اس طرح بدنام کیا جاتا ہے کہ وہ اپنے لیے آواز اٹھانا بھول جاتی ہیں۔ اس طرح نوعمر لڑکیاں اور خواتین تشدد کا نشانہ بنتی رہتی ہیں۔وہیں 39 سالہ پاروتی دیوی کا کہنا ہے کہ خواتین کے ساتھ صرف سماجی تشدد ہی نہیں ہوتا بلکہ معاشی تشدد بھی ہوتا ہے۔ کام کی بنیاد پر بھی اس کے ساتھ امتیازی سلوک کیا جاتا ہے۔ جب کوئی عورت کام پر جاتی ہے اور کوئی کام کرتی ہے تو اسے صرف 230 روپے یومیہ ادا کیا جاتا ہے، جبکہ اگر کوئی مرد اتنے ہی گھنٹوں میں کام کرتا ہے تو اسے 500 روپے ملتے ہیں۔ اگر ہم اس موضوع پر بات کریں تو دلیل دی جاتی ہے کہ مرد پتھر توڑ سکتا ہے لیکن عورت نہیں کر سکتی۔ جبکہ سچ یہ ہے کہ عورت بھی مرد کی طرح پتھر توڑتی ہے۔ لیکن اس کے باوجود انہیں مردوں کے مقابلے کم اجرت دی جاتی ہے۔
اس حوالے سے سماجی کارکن نیلم گرانڈی کا کہنا ہے کہ آج بھی ہمارے معاشرے میں خواتین کے حوالے سے بہت باتیں کی جاتی ہیں، خواتین کو بااختیار بنانے کے نعرے دیئے جاتے ہیں، عورت دنیا کی ماں ہے، وہ کمزور نہیں ہے وغیرہ وغیرہ بڑی بڑی باتیں کہی جاتی ہیں۔لیکن حقیقی معنوں میں آج بھی خواتین کو بہت کچھ برداشت کرنا پڑتا ہے اور معاشرہ خاموش رہتا ہے۔ نیلم کہتی ہیں کہ اس کے پیچھے سب سے بڑی وجہ یہ ہے کہ دیہی خواتین خود اپنے حقوق سے آگاہ نہیں ہیں۔ دیہات کے مقابلے شہروں میں خواتین اور نوعمر لڑکیاں اپنے حقوق جانتی ہیں، یہی وجہ ہے کہ دیہات کے مقابلے شہروں میں خواتین پر مظالم کم ہوتے ہیں۔ اگر کسی وجہ سے وہ تشدد کا شکار بھی ہو جائے تو وہ کھل کر اس کے خلاف آواز اٹھاتی ہے۔ نیلم گرانڈی کا کہنا ہے کہ خواتین پر ہونے والے مظالم کے خلاف خواتین کو خود آواز اٹھانی ہوگی۔ دوسری طرف معاشرے کو یہ بھی سمجھنا ہوگا کہ آئین کے تحت سب کو مساوی حقوق حاصل ہیں۔ وقت بدل رہا ہے، اس لیے پدرانہ سماج کو بھی اپنی سوچ بدلنی ہوگی۔ سوال یہ پیدا ہوتا ہے کہ اگر اخلاقیات اور روایات کا مقصد معاشرے کو صحیح سمت میں لے جانا ہے تو پھر مردوں سے بھی اس پر سختی سے عمل کیوں نہیں کرایا جاتا ہے؟ (چرخہ فیچرس)
مصنفہ سمترانندن پنت گورنمنٹ کالج، گروڈکی طالبہ ہے۔
