حیدرآباد (یواین آئی)شہریت ترمیمی قانون پر ناراضگی کے سلسلہ میں کئے گئے احتجاج کے موقع پر دہلی کی جامعہ ملیہ اسلامیہ کے طلبہ پر پولیس کی زیادتی کے خلاف شہر حیدرآباد کی مشہور عثمانیہ یونیورسٹی کے طلبہ نے مومی شمعوں کی ریلی نکالی۔ ریلی میں بڑے پیمانہ پر طلبہ نے حصہ لیتے ہوئے اپنے غم وغصہ کا اظہار کیا۔ میڈیا سے بات کرتے ہوئے ڈی بی ایس اے ،ڈی ایم ایس اے ،بھیم ڈرم تنظیموں کے ذمہ دار شرت چمار نے کہا کہ وہ جامعہ ملیہ اسلامیہ اور علی مسلم یونیورسٹی کی بہنوں کے جذبہ کو سلام کرتے ہیں۔انہوں نے کہاکہ ملک کو سازشیوں سے بچانے کی ضرورت ہے ۔انہوں نے پولیس کی زیادتی کی شدید مذمت کی۔طلبہ نے حکومت اور بی جے پی کے خلاف نعرے بازی بھی کی اور اس قانون کو فوری واپس لینے کا مطالبہ کرتے ہوئے اس بل کی کاپیاں پھاڑدیں۔طلبہ کے ہاتھوں میں پلے کارڈس اور قومی پرچم تھے ۔ یہ احتجاج کیمپس کے اندر کیاگیا۔ اس موقع پر طلبہ کے ایک پلے کارڈ پر لکھاتھا [؟]کسی کے باپ کا ہندوستان تھوڑی ہے [؟]۔طلبہ نے آرٹس کالج کے قریب ریلی نکالی اور امیت شاہ کا پتلا نذر آتش کیا۔
