وی سی پروفیسر اے رویندر ناتھ نے یونیورسٹی کی تعلیمی ترقی اور پیشرفت میں پروفیسر ولی محمد شاہ کی نمایاں خدمات کو سراہا
لازوال ڈیسک
گاندربل؍؍ سینٹرل یونیورسٹی آف کشمیر کے فیکلٹی ممبران، ریسرچ اسکالرس اور طلباء نے، وائس چانسلر، پروفیسر اے رویندر ناتھ کی قیادت میں، پروفیسر ولی محمد شاہ، ڈین، اسکول آف فزیکل اینڈ کیمیکل سائنسز، ڈائریکٹر ڈی آئی کیو اے اور ہیڈ ڈیپارٹمنٹ آف میتھمیٹکس کو ریٹائرمنٹ کی عمر تک پہنچنے پر الوداع کیا۔اس موقع پر اظہار خیال کرتے ہوئے وائس چانسلر پروفیسر اے رویندر ناتھ نے یونیورسٹی کی تعلیمی ترقی اور پیشرفت میں پروفیسر ولی محمد شاہ کی نمایاں خدمات پر روشنی ڈالی۔ واضح رہے پروفیسر شاہ نے شعبہ ریاضی کے تعلیمی منظرنامے کو تشکیل دینے میں اہم کردار ادا کیا اور یہ بھی یقینی بنایا کہ یونیورسٹی NAAC کے دورے کے لیے پوری طرح تیار ہے۔انہوں نے کہا کہ یہ تقریب پروفیسر ولی محمد شاہ کے کارناموں کو منانے کے لیے منعقد کی گئی ہے۔اپنے خطاب میں پروفیسر ولی محمد شاہ نے الوداعی تقریب کے انعقاد پر وائس چانسلر پروفیسر اے رویندر ناتھ اور فیکلٹی ممبران کا شکریہ ادا کیا۔ انہوں نے سی یو کے میں اپنے دور کو ایک یادگار قرار دیا اور اپنے دور کے دوران ان کی غیر متزلزل حمایت اور تعاون کے لئے تمام عہدیداروں کا شکریہ ادا کیا۔
