کہا اس طرح کی تقریبات اتحاد اور کھیلوں کی مہارت کو فروغ دیتی ہیں
لازوال ڈیسک
جموں؍؍سیکرٹری اَمورِ نوجوان و کھیل کود محکمہ سرمد حفیظ نے آج یہاں ایم اے سٹیڈیم میں 68ویں نیشنل سکول گیمز کا اِفتتاح کیا۔جوڈو اَنڈر 17 لڑکوں کے زُمرے پر مشتمل یہ کھیل ان مقابلوں کی سیریز کا حصہ ہے جن کی میزبانی جموں و کشمیر چار کھیلوں جوڈو، ووشو، فینسنگ اور فٹ بال میں کر رہی ہے۔ملک بھر سے پینتیس (35) ٹیمیںجن میں تقریباً 350 ایتھلیٹس شامل ہیں، اَپنی مہارت اور صلاحیتوں کا مظاہرہ کرتے ہوئے اعلی اعزازات کی خاطر مقابلہ کرنے کے لئے تیار ہیں۔
https://jkgad.nic.in/common/iasOfficer.aspx?Id=303
سرمد حفیظ نے تقریب سے خطاب کرتے ہوئے اَمورِ نوجوان و کھیل کود محکمہ کی کامیابیوں اور سرگرمیوں کو سراہا۔اُنہوں نے ملک بھر سے آنے والے شرکأ کا خیرمقدم کرتے ہوئے اس بات پر زور دیا کہ اس طرح کی تقریبات اتحاد اور کھیلوں کی مہارت کو فروغ دیتی ہیں۔سیکرٹری نے جموں و کشمیر میں اس طرح کی تقریبات کی میزبانی کی اہمیت پر روشنی ڈالتے ہوئے کہا کہ اس طرح کی تقریبات کھیلوں کو فروغ دینے ، امن اور ہم آہنگی کو فروغ دینے کے علاوہ سیاحت کو بھی فروغ دیتی ہیں۔
اُنہوں نے مزید کہا کہ اِس طرح کے ایونٹ خطے کی قومی سطح کے کھیل مقابلوں کی میزبانی کی صلاحیت کو ظاہر کرتے ہیں۔ڈائریکٹر جنرل اَمورِ نوجوان او رکھیل راجندر سنگھ تارا نے اَپنے اِستقبالیہ خطاب میں امید ظاہر کی کہ شرکأ جموں و کشمیر میں گزارے گئے اَپنے وقت کا لطف اُٹھائیں گے اور ٹورنامنٹ کی دیرپا یادیں اپنے ساتھ لے کر جائیں گے۔اُنہوں نے کہاکہ کھیلوں کے دوران زائد اَز 4,000 شرکأ مختلف شعبوں میں حصہ لیں گے اورجموںوکشمیر کے اُبھرتے ہوئے کھلاڑیوں کی حوصلہ اَفزائی کرنے اور یونین ٹیریٹری میں کھیلوں کو فروغ دینے کے عزم پر زور دیا۔یہ بات قابلِ ذِکر ہے کہ 68 ویں نیشنل سکول گیمز نوجوان ایتھلیٹوں کے لئے ایک دلچسپ پلیٹ فارم بننے کا وعدہ کرتی ہیں جس سے رِیاستوں میں سپورٹس مین شپ اور بھائی چارہ کو فروغ ملے گا۔
