لازوال ڈیسک
سری نگر؍؍ایک اہم پیش رفت میںراجوری ضلع کے راجوری چِکری ووڈ کرافٹ اور اَننت ناگ ضلع کے مشکہ بُدجی چاول کو جیوگرافیکل اِنڈکشن ( جی آئی) ٹیگ ملا ہے ۔نو مصنوعات کی ٹیگنگ کا عمل کووِڈ کے مشکل وقت میں دسمبر 2020 میں نبارڈ نے ہینڈی کرافٹس اینڈ ہینڈلوم اور محکمہ زراعت کے ساتھ مشاورت سے شروع کیا تھا۔ ایک طویل قانونی عمل کے بعد آخر کار ان دونوں مصنوعات کوجی آئی ٹیگس دئیے گئے ہیں۔ نبارڈ کے تعاون سے مجموعی طور پر چار مصنوعات کو جی آئی ٹیگ دیا گیا ہے۔چِکری ایک پیلا شہد رنگ کی باریک دانے والی نرم لکڑی ہے جو صوبہ جموںکے راجوری ضلع کے پہاڑی سلسلوں میں پائی جاتی ہے ۔ راجوری کی چِکری لکڑی کا سامان پیچیدہ نقش و نگار اور تفصیل سے نمایاں ہے ۔اِسی طرح مشکہ بُدجی چاول خوشبو دار چاولوں کی ایک پریمیم قسم ہے جو وادی کشمیر کے بالخصوص ضلع اننت ناگ میں اُگائی جاتی ہے۔ پکا ہوا مشکہ بُدجی چاول منفرد ہے اور ذائقہ ، خوشبو اور بھرپور آرگنولیپٹک خصوصیات کا ہم آہنگ اِمتزاج رکھتا ہے۔جیو گرافیکل اِنڈکشن ( جی آئی ) دانشورانہ املاک کے حق کی ایک شکل ہے جو ایک مخصوص جغرافیائی محل وقوع سے پیدا ہونے والے سامان کی شناخت کرتی ہے اور اس مقام سے منسلک الگ نوعیت، معیار اور خصوصیات رکھتی ہے۔جی آئی ٹیگنگ کے بعد صرف ایک مجاز صارف کو ان مصنوعات کے سلسلے میں جغرافیائی اِشارے اِستعمال کرنے کے خصوصی حقوق حاصل ہیں۔اس کی وجہ سے کوئی بھی شخص اَپنے جغرافیائی علاقوں سے باہر اِس کی نقل نہیں کرسکتا ۔ یہ تیسرے فریق سے ان رجسٹرڈ جیوگرافیکل اِنڈکشن اشیاکے غیر مجاز اِستعمال کو روکے گا ، برآمدات کو فروغ دے گااور بین الاقوامی سطح پر ان کے برانڈز کو فروغ دے گا ۔اِس طرح ملک کے جی ڈی پی میں شراکت سمیت پروڈیوسروں اور متعلقہ شراکت داروں کی اِقتصادی خوشحالی کو فروغ ملے گا۔جنرل منیجر نبارڈ بھلا مودی سریدھر نے حکومت جموںوکشمیر کے متعلقہ محکموں کا شکریہ اَدا کیا او رتمام جی آئی درخواست گزار آرگنائزیشنوں کو مُبارک باد دی ۔ اُنہوں نے مزید بتایا کہ اس برس مارچ کے شروع میں کٹھوعہ کی بسوہلی مصوری اور لداخ کی لداخ لکڑی کی نقاشی کو نبارد کے تعاون سے جی آئی ٹیگ ملا تھا ۔ جموںوکشمیر کی مزید پانچ مزید مصنوعات جی آئی ٹیگ حاصل کرنے کے آخری مراحل میں ہیں۔
