کہااقتدار کی بھوک ہوتی توقومی سیاست سے کبھی دستبردار نہ ہوتا ، اپنے لوگوں کی خدمت کرنا چاہتا ہوں
لازوال ڈیسک
ڈوڈہ// ڈیموکریٹک پروگریسو آزاد پارٹی کے چیئرمین غلام نبی آزاد نے آج یہاں ضلع ڈوڈہ کے تحت بھدرواہ ٹاؤن اور سندھرا بھلا بلاک میں پارٹی کارکنوں سے خطاب کرتے ہوئے کہا کہ علاقائی سیاست میں واپسی اور جموں و کشمیر میں اپنی سیاسی پارٹی بنانے کے ان کے خیال کا مقصد ترقی کے نامکمل ایجنڈے اور ان منصوبوں کو پورا کرنا ہے۔ انہوں نے کہا کہ اگر وہ اقتدار کے بھوکے ہوتے تو وہ قومی سیاست سے کبھی دستبردار نہ ہوتے جہاں وہ زیادہ طاقت کا مزہ لے سکتے تھے۔ انہوں نے کہا قومی سیاست میں، آپ کو اقتدار سے لطف اندوز ہونے کا موقع ملتا ہے اور کام کا دباؤ کم ہوتا ہے۔ لیکن علاقائی سیاست کے معاملات میں زمین پر براہ راست معاملات کی وجہ سے اقتدار سے لطف اندوز ہونے کے امکانات کم ہوتے ہیں ۔انہوں نے کہا کہ یہ جاننے کے باوجود وہ علاقائی سیاست میں واپسی کرنے کا انتخاب کیا ہے۔ انہوں نے کہا کہ میں اپنے لوگوں کے پاس واپس آیا ہوں کیونکہ میں ان کی خدمت کرنا چاہتا ہوں اور جموں و کشمیر کے امن اور ترقی کے لیے جو بھی ضروری ہے وہ کرنا چاہتا ہوں۔ آزاد نے کہا کہ اپنے دور میں انہوں نے بہت سے منصوبوں کی منظوری دی اور ان پر عملدرآمد کیا لیکن ابھی بہت کچھ کرنے کی ضرورت ہے۔ انہوں نے کہا کہ میں آپ کو بتانا چاہتا ہوں کہ مجھے اپنے لوگوں کے لیے اور بھی بہت کچھ کرنا ہے اور میں آپ سب سے کہتا ہوں کہ مجھے اور میری پارٹی کو ایک موقع دیں۔ انہوں نے کہا کہ ڈی پی اے پی کا مقصد لوگوں کی فلاح و بہبود ہے اور انہوں نے اپنے کارکنوں سے کہا کہ وہ اپنے اپنے علاقوں میں عوامی جلسوں پر توجہ دیں۔ جلسہ عام میں جی ایم ایس سروڑی وائس چیئرمین، عبدالمجید مجید وانی جنرل سکریٹری، انیتا ٹھاکر جنرل سکریٹری، پی آر منہاس زونل صدر، آصف گٹو ضلع صدر، پربھا سلاتھیہ مہیلا ونگ صدر، سنیتا اروڑہ ترجمان، جاوید آزاد وی پی زون، عارف نجاڑ، پریتم کوتوال صوبائی سیکرٹری، شیخ ظفر اللہ جنرل سیکرٹری زون چناب، محمد اشرف گونی اور دیگران شامل تھے ۔
