اسلام آباد، 05 اگست (یواین آئی) پاکستان کے سابق وزیراعظم عمران خان کو ڈسٹرکٹ اینڈ سیشن کورٹ اسلام آباد کی جانب سے3 سال قید کی سزا اور ایک لاکھ روپے جرمانہ عائد کیے جانے کے بعدلاہور سے گرفتار کرلیا گیا۔
ڈسٹرکٹ اینڈ سیشن عدالت نے توشہ خانہ کیس میں پاکستان تحریک انصاف (پی ٹی آئی) کے چیئرمین عمران کو مجرم قرار دیا ہے۔
عمران کے خلاف فیصلہ آتے ہی پاکستان پولیس نے بھی کارروائی کی اور انہیں لاہور سے گرفتار کر لیا گیا ہے۔
قانونی ماہرین کا کہنا ہے کہ اس معاملے سزا سے عمران خان کا سیاسی کیرئیر ختم ہوسکتا ہے۔ نومبر کے آغاز سے قبل ہونے والے عام انتخابات میں عمران کے حصہ لینے کے امکانات بہت کم ہیں۔
’ڈان نیوز‘ کے مطابق پولیس نے چیئرمین پی ٹی آئی کو زمان پارک میں ان کی رہائش گاہ سے گرفتار کیا، پولیس کا کہنا ہے کہ عمران خان کو کوٹ لکھپت جیل منتقل کیا جارہا ہے۔
پی ٹی آئی پنجاب کے آفیشل ٹوئٹر اکاؤنٹ سے کی جانے والی ایک ٹوئٹ میں ان خبروں کی تصدیق کی گئی کہ عمران خان کو کوٹ لکھپت جیل منتقل کیا جا رہا ہے۔
قبل ازیں ڈسٹرکٹ اینڈ سیشن کورٹ اسلام آباد میں جج ہمایوں دلاور نے توشہ خانہ کیس ناقابل سماعت ہونے سے متعلق درخواست مسترد کرتے ہوئے چیئرمین پی ٹی آئی کو 3 سال قید کی سزا سنادی تھی اور ایک لاکھ روپے جرمانہ بھی عائد کیا۔
توشہ خانہ کارروائی کیس کی سماعت 3 مرتبہ وقفے کے بعد شروع ہوئی، عدالت نے فیصلہ سناتے ہوئے کہاکہ ملزم کے خلاف جرم ثابت ہوتا ہے، ملزم نے الیکشن کمیشن میں جھوٹی تفصیلات جمع کرائیں، ملزم کرپٹ پریکٹسز کے مرتکب پائے گئے ہیں، ملزم نے جان بوجھ کر الیکشن کمیشن میں جھوٹی تفصیلات دیں۔
جج ہمایوں دلاور نے فیصلہ سنایا کہ ملزم کو الیکشن ایکٹ کی سیکشن 174 کے تحت 3 سال قید اور ایک لاکھ جرمانے کی سزا سنائی جاتی ہے، ملزم آج عدالت میں پیش نہیں ہیں، فیصلے کی کاپی آئی جی اسلام آباد کو عملدرآمد کے لیے بھجوائی جائے۔
قبل ازیں آج صبح سماعت کا آغاز ہوا تو الیکشن کمیشن کے وکلا امجد پرویز اور سعد حسن عدالت میں پیش ہوئے تاہم پی ٹی آئی کی جانب سے کوئی وکیل عدالت میں پیش نہ ہوا۔
سماعت کے آغاز سے قبل پولیس کی بھاری نفری احاطہ عدالت کے باہر تعینات تھی اور صرف وکلا کو کمرہ عدالت کے اندر جانے کی اجازت تھی، تاہم سماعت کے دوران عمران خان یا ان کے وکیل عدالت میں پیش نہ ہوئے
