اوڑی حلقہ سے متعلق مختلف مسائل سے آگاہ کیا
لازوال ڈیسک
جموں ؍؍سابق کابینہ وزیر، سابق ایم ایل اے اڑی اور ڈیموکریٹک پروگریسو آزاد پارٹی کے خزانچی تاج محی الدین نے جموں و کشمیر کے لیفٹیننٹ گورنر منوج سنہا سے راج بھون جموں میں ملاقات کی۔تاج محی الدین نے انہیں اْوڑی حلقہ سے متعلق مختلف مسائل خصوصاً پہاڑی سڑکوں پر برف صاف کرنے، بونیار حادثہ کے متاثرین کی امداد اور بحالی اور بجلی کی جلد بحالی اور دیگر مسائل سے آگاہ کیا۔تاج محی الدین نے لیفٹیننٹ گورنر سے درخواست کی کہ وہ بونیار اور اوڑی کے آگ سے متاثرہ مختلف متاثرین کے لیے امدادی اور بحالی فنڈ جاری کریں کیونکہ وہ اس سخت سردی میں شیڈوں میں رہنے پر مجبور ہیں۔انہوں نے ان سے مزید درخواست کی کہ وہ ان لوگوں کے لیے پانچ لاکھ روپے کی ایکس گریشیا جاری کریں جنہوں نے مہلک بوجھ تھلن روڈ حادثے میں اپنی جانیں گنوائیں جہاں گیارہ قیمتی جانیں ضائع ہوئیں۔اپنے پیغام میں انہوں نے سڑک حادثے میں اپنے پیاروں کو کھونے والے لوگوں سے گہری ہمدردی اور یکجہتی کا اظہار کیا اور یقین دلایا کہ زخمیوں کو کسی بھی قسم کی مدد کی ضرورت پڑنے پر وہ صرف ایک فون کال کے فاصلے پر ہیں۔ایل جی تاج محی الدین کے ساتھ اپنی ملاقات میں انہیں جموں و کشمیر کے مرکز کے زیر انتظام علاقے سے متعلق مختلف ترقیاتی مسائل کے بارے میں بھی آگاہ کیا۔انہوں نے ان سے اپیل کی کہ وہ ٹریفک اور محکمہ پولیس کو رہنما خطوط بھیجیں تاکہ مستقبل میں ایسے جان لیوا حادثات سے بچنے کے لیے روڈ سیفٹی کے اقدامات کیے جائیں۔تاج محی الدین نے بونیار کے فائر سروس سٹیشن کا مسئلہ اٹھایا کیونکہ فائر سروس سٹیشن کی عدم دستیابی کی وجہ سے کافی نقصان ہو چکا ہے جہاں پر ایل جی نے انہیں یقین دلایا کہ ایک ماہ کے اندر بونیار میں فائر سروس سٹیشن نصب کر دیا جائے گا۔
