جاری ترقیاتی کاموں کا معائنہ کیا، رکاوٹیں ختم کیں، اور عہدیداروں کو ہدایت کی کہ سڑک کو جلد تعمیر کروایا جائے
سرفرازقادری
مینڈھر//سب ڈویژن مجسٹریٹ مینڈھر جہانگیر خان (جے کے اے ایس) نے نائب تحصیلدار بھاٹادوڑیاں انتخاب خان اور سرپنچ نکہ اقبال خان کے ہمراہ ناڑ گاؤں کا ایک وسیع دورہ کیا۔ ایس ڈی ایم نے مختلف حکومتوں کے تحت جاری مختلف ترقیاتی کاموں کا معائنہ کیا۔ گاؤں میں اسکیمیں بنائیں اور این اے بی اے آر ڈی اسکیم کے تحت نکہ سے ناڑ تک 3 کلو میٹر سڑک کی تعمیر میں زمینداروں کے درمیان موجود زمینی تنازعہ کو حل کیا۔ دورے کے دوران مقامی لوگوں کی طرف سے جو ناکہ بندی کی گئی تھی انہیں موقع پر ہی ختم کر دیا گیا اور تمام لوگوں کو سخت ہدایات جاری کی گئیں کہ وہ کام کی انجام دہی میں کسی قسم کی رکاوٹ پیدا کرنے سے گریز کریں۔ جہانگیر خان نے محکمہ پی ڈبلیو ڈی کے افسران اور متعلقہ ٹھیکیدار کو ہدایت کی کہ وہ مذکورہ کام کو مقررہ مدت میں مکمل کریں تاکہ عوام کی مشکلات کو ترجیحی بنیادوں پر کم کیا جاسکے۔ ایس ڈی ایم کے ناڑ گاؤں کے دورے اور زمینی تنازعہ کو حل کرنے اور ترقیاتی کاموں کی بروقت تکمیل کو یقینی بنانے کے لیے ان کی فوری کارروائی کو مقامی لوگوں نے بڑے پیمانے پر سراہا ہے۔ ایس ڈی ایم نے یہ انتباہ بھی دیا ہے کہ کام کی انجام دہی میں رکاوٹ ڈالنے والوں کے خلاف قانون کے تحت کارروائی کی جائے گی۔
