بھونیشور؍؍ ہندوستان کے خلاف اولمپک کوالیفائرس مقابلہ کھیلنے امریکہ کی خاتون ہاکی ٹیم ہندستان پہنچ گئی ہے ۔ یہ مقابلہ ایک اور دو نومبر کو بھونیشور کے کلنگا اسٹیڈیم میں کھیلا جائے گا۔امریکی ٹیم اس مقابلے کے لئے بھونیشور پہنچ گئی ہے ۔ امریکی ٹیم کی کپتان کیتھلین شارکي نے ہندوستان میں ایک بڑا ایوینٹ کھیلنے پر خوشی کا اظہار کرتے ہوئے کہا کہ ہندستان میں کھیلنا دلچسپ ہے ۔ اس ٹیم میں شامل کوئی بھی کھلاڑی پہلے کبھی ہندستان میں نہیں کھیلی ہے جس کی ہاکی میں تابناک تاریخ ہے ۔ ہمیں اولمپکس کوالیفائرس کا بے تابی سے انتظار ہے ۔ہندستانی ٹیم کا آخری بار امریکہ سے مقابلہ 2018 کے خواتین ورلڈ کپ میں ہوا تھا جہاں ہندستان نے 1-1 کا ڈرا کھیلا تھا۔ اولمپکس کوالیفائرس میں دو میچ ہوں گے جس میں پوائنٹس کی بنیاد پر فیصلہ ہوگا کہ کون سی ٹیم اگلے سال ٹوکیو اولمپکس میں کھیلے گی۔
