از : فریدہ نثار احمد انصاری۔
دوحہ۔قطر۔
اس بار بھی بارش آئی ہے
جو مجھ کو یاد دِلاتی ہے
اُس الھڑ ننھی لڑکی کی
جو جگنو پکڑا کرتی تھی
کاغذ کی ناؤ بناتی تھی
جھولوں پر جھولا کرتی تھی
ٹینس وہ کھیلا کرتی تھی
اب وقت گیا وہ بات گئی
وہ موسم اور برسات گئی
اب ٹینس ہاتھ سے چھوٹ گیا
جھولوں کی رسی ٹوٹ گئی
کاغذ کی ناؤ بھی ڈوب گئی
خواہش کے جگنو روٹھ گئے
خوابوں کے شیشے ٹوٹ گئے
اب اُس کے دل کی خواہش ہے
بچپن پھر سے آواز تو دے
پھر جھوم کے وہ جگنو پکڑے
کاغذ کی کشتی تیرائے
پیڑوں سے جھولے لٹکائے
ہاتھ میں پھر ٹینس پکڑے
اور وقت وہیں پر تھم جائے
اور وقت وہیں پر تھم جائے !!!!
